上星期講到，我曾跟住中學同學Dorinne自創嘅「蘋果×乳酪」餐單，試咗大約一個星期已經見效，係咁去水，總共瘦咗5磅；但去到差唔多1個月後，我就決定唔再繼續。點解？因為有負作用：此餐單會傷胃！
每日都齋食蘋果同乳酪，而蘋果含高鞣酸，會刺激胃酸增加，適量進食還可以，但每餐只食蘋果同乳酪，你都估到會有幾多胃酸產生啦，加上食量的確比未食呢個餐單時小，胃酸分泌又多，所以對腸胃一定唔係咁好，於是我就走去問Dorinne，原來佢都有呢個問題。我叫佢唔好勉強，但「女為悅己者容」，要靚？條命都可以唔理啦！
另一個問題可能同口味有關，Dorinne話佢食咗呢個餐單後就變得無晒胃口，梗係啦，來來去去都係酸味，食得多都無mood啦！寫呢篇稿之前，我決定上網做吓research，發現有個近似嘅餐單，就係連食3日，每日三餐都食一隻香蕉、一至兩杯乳酪同飲水，標榜3日減4至6磅，但就話「絕不能長期使用」，因為餐單缺乏營養素咁話。所以奉勸各位：肥可以減，但都係以身體健康為大前提。
（蘋果減肥法二之二）
Menu：香蕉餐單
．每日3餐
．每餐1隻香蕉、1-2杯乳酪、水
．只食3天
．約減4-6磅
AngelaFatty：天生葫蘆身形，體重最高峯達200磅，曾以不同減肥法減去90磅，累積唔少減肥心得。