聽到話要用刀叉食壽司，係咪感覺「懶招積」？好，聽住，型格意大利餐廳名廚主理，用盡意國矜貴海產如藍鰭吞拿、章紅魚、鱸魚、深海小龍蝦等等，做出精緻刺身、壽司加手卷，唔止要用刀叉食，直頭係唔捨得食，你話，係咪抵佢咁招積！
記者：梁美甜
攝影：王文忠
Model：Ayu
星級小龍蝦做壽司
位於北京道1號頂樓的aqua，一副型格相，走高格調路線，吃的是精緻鮮味菜式。新近推出期間限定「意式壽司」，「唓！意大利餐廳做壽司咪叫意式壽司囉，有咩咁新奇！」一看用料，咦？全部來自意大利沿海及西西里島一帶的海鮮，亞德里亞的深海小龍蝦、西西里島的章紅魚、意大利黃鮨吞拿魚、薩丁尼亞龍蝦、野生鱸魚等等，較一般高檔次壽司店更講究！期間限定推出的分別有8款手握壽司、4款刺身及2款卷物，注入濃濃意大利風情卻糅合和食烹調技巧，要用刀叉品嚐至襯得起。
必試亞德里亞深海小龍蝦配橙皮及番茄泡沫，這款小龍蝦在意大利廚師心目中屬明星級材料，事關牠的味道似足龍蝦，但更新鮮爽甜，一刀切下，感覺肉質結實，入口更是爽滑彈牙，伴以新鮮番茄打成的幼滑泡沫來吃，鮮上加鮮！手握壽司則有餐廳自家以蘋果木煙製的海魚選擇，如章紅魚、左口及三文魚，日本章紅魚就食得多，意大利章紅魚你食過未？來自西西里島沿海的章紅魚，肉質結實帶點粉紅色澤，油份較重，入口零舍甘香，大廚將煙熏後的章紅魚，簡簡單單髹上少許橄欖油，配以味道細緻、口感結實的意大利北梭魚魚子同吃，陣陣煙熏香夾雜魚子的鹹香，味道複雜有層次。由於海魚本身味道帶微鹹，經大廚精心配搭之後，全部壽司刺身均不用蘸豉油來佐吃，拿刀一切，叉起送入口，已能嚐到各種海魚的鮮，吃得超滿足！
玩出創意
「意式壽司」的幕後搞手就是廚師長MarcoMedaglia！先後與多位米芝蓮星級名廚合作的Marco，直言創意本身就是Game，即係玩玩吓？沒錯！別人戲言意式材料難以日式呈現，Marco即時反應：「Icando！Iplay！」就是如此玩出變化，呢啲咪就係真正嘅PlayHard囉。話明期間限定，供應期由即日至6月底，$788可嚐盡8款壽司、4款刺身及2款卷物，或以$198及$258分別品嚐4款及6款壽司刺身。
4款精選刺身
造型如藝術品，刺身夠新鮮，只消加點鹽或油，即能帶出鮮味；當中以那個魚子雪糕球最吸引，幼滑帶微鹹，與油份充足的劍魚是絕配。
2款意式卷物
意大利水牛芝士配活龍蝦乾魚子，活龍蝦來自薩丁尼亞，鮮甜爽脆，乾魚子鹹鹹香香，煙韌有咬口；牛油果三文魚卷配北梭魚魚子，則味道層次豐富。
8款期間限定壽司
亞德里亞深海小龍蝦配橙皮及番茄泡沫
小龍蝦鮮甜爽口，加上幼滑番茄泡沫，味道清新。
西西里島紅蝦配薄荷泡沫
紅蝦乃海蝦，肉質結實彈牙，配淡淡的薄荷泡沫，感覺更爽更Fresh。
自製煙章紅魚配北梭魚魚子
西西里島章紅魚色澤粉紅，以蘋果木煙熏後配北梭魚魚子，味道甘香。
煙三文魚配魚子時蘿香草
自製煙三文魚肥美，魚子爽口，迸發不同口感，還滲着淡淡時蘿香草香。
藍鰭吞拿魚配迷迭香油
藍鰭吞拿魚的甘香油腴不用多說，以香草及橄欖油來配已能帶出鮮味。
意大利黃鮨吞拿配香橙油
黃鮨吞拿雖不及藍鰭矜貴，但同樣肥美，灑上炒芝麻入口更覺甘香。
煙左口魚配茴香橄欖油
未入口，已聞到獨特煙熏香，配上茴香橄欖油，味道更加豐富。
亞德里亞帶子配檸檬油海鹽
亞德里亞帶子不比北海道珍寶帆立貝遜色，鮮甜厚肉，還帶鹽香。
aqua（34272288）
尖沙嘴北京道1號29樓