小圈子天賦特權怎容剝奪？蟻民豈敢以選票起義？五區公投來勢洶洶，一班吃慣政治免費午餐的「膠能組別」議員，昨日破天荒落區反擊。中指黃、廿蚊張、AbsentFok紆尊降貴來到旺角，邊嘆雪茄飲紅酒，邊教訓市民5.16別投票，「廢除功能組別，我去邊度搵番份咁筍嘅工呀？」他們其實由一班社運青年假扮，希望以反面手法，激發市民今日投票。
「膠能組別」仝人空降旺角行人專用區，吸引大批市民圍觀拍照，一睹小圈子議員刻薄成性、維護特權的嘴臉。笠上黃宜弘頭套，演員即時「上身」。面對廣大眾群，他一邊狂噴雪茄，一邊直豎中指。
中指黃、廿蚊張 怕飯碗不保
這一天他似乎心事重重，「你知唔知呀，一人一票會有好多人失業o架！我哋功能組別份工冇咗點算呀？」中指黃是我們尊貴的功能組別商界議員，1991年至今均以零票自動當選。他的政壇代表作，包括開會慣性「瞌眼瞓」、03年7月9日向在立法會外集會反對23條的市民高舉中指。「你哋五區公投搞三搞四，影響我哋，知唔知家官不聊生呀？」
幸好800人選出來的特首曾蔭權宣佈不投票，令中指黃略為安心，但他抱怨這傀儡特首太遲表態，「平時佢講乜我講乜，佢要通過乜我通過乜。如果佢去投票，我同佢死過都似！我實聯同商界精英撤資香港，同地產商一齊壓死香港政府。」
近期人氣爆燈的「廿蚊張」則手持巨型「廿蚊張」在街上大搖大擺，提醒低下街層：你們的時薪只值廿蚊。廿蚊張是飲食界「零票當選」議員，為保老闆利益他不惜刻薄基層，其實他本人也很怕飯碗不保。「佢哋搞公投，我除咗冇得做議員，咁我哋啲專業人士點幫政府把關，點保障大財團發展呀。冇咗我哋，香港仲邊有咁多壟斷呀？」
80後精心策劃 反諷醜惡面貌
走入議會，AbsentFok霍公子連自己的座位也認錯，但昨日落區，他絕對清楚自己的位置。戴着立法會缺席率冠軍的金牌，AbsentFok懇請選民要向他學習，別盡公民責任，杯葛五區公投，「公投好無稽、無聊呀，你哋做咁多嘢係冇用o架。商人治港官商勾結係事實，為咗大家可以繼續和諧生活．你哋千祈千祈唔好去投票呀！」
「膠能組別」仝人愛落區，宣傳「你的冷感我的搵銀」這重要反公投訊息，其實由一班80後反高鐵青年精心策劃。「幕後黑手」曾浚瑛昨表示，坊間有大量撐公投的正面訊息，但市民可能未感受到小圈子政府帶來的切膚之痛。
他們希望以反諷方式，向公眾展示功能組別官商勾結的醜惡面貌，激發市民投票。「最低工資得廿蚊、六四可以唔平反，開會可以唔做嘢，所以市民一定要表態。」「嗰班所謂嘅高官特首投唔投票，我哋唔重視，我哋最希望係廣大市民出嚟投票，踢走功能組別！」他們今日會在大埔、沙田及旺角繼續宣傳。
