精電（710）經過去年狠手撥備，加埋定單強勁回流，本年度應該有張靚仔成績表，先睇位兜轉。精電主打液晶體顯示器產銷，09年度業績勁蝕2.68億銀，主要因為集團將業務欠佳嘅流動電話顯示屏項目自願清盤，而錄到2.5億銀虧損。但經過呢次狠撥，精電再無後顧之憂。
隨住環球市場回穩，呢期歐美市場定單回流，就連精電去年第4季先投入嘅新生產線，使用量已接近飽和。再講，祖國汽車市場潛力極大，加強精電谷底回升嘅能力，精電今年應該有景。
係咁易計數，精電本年度純利上番1億銀，預期PE8.4倍，有內銷元素跟尾，呢個PE水位抵買。精電再跌的話，實2.25元支持兜轉，以2010年度10倍PE做目標，精電可見3.10元，回報率38%。
天地數碼具注資概念
天地數碼（500）齋計上年年尾嘅手頭淨現金，高達3.26億銀，若連埋出售機頂盒項目資金3.3億銀回籠，集團手頭淨現金應該上到6.56億銀，相當於每股0.58元，每股淨現金等於現價！集團出售核心機頂盒業務後，天地數碼大股東北京中信注資概念變得好強。趁天地數碼股價跌到近半年低位，嚟轉短打，博升20%到0.70元，亦未有耐上到NAV0.90元水位。
錢雋