平日官仔骨骨，無諗過黎天王咁打得！《火龍》喺戲院唔算上咗好耐，但睇到駁火槍戰位，估唔到黎明好似Rambo上身咁款，打極唔死！加埋BD玩DTS-HDMA7.1，有槍聲，有炸彈聲，屋企睇真係嘈到坼天！
記者：陳國輝
鬍鬚明VS爛口智
論明星都唔少，除咗黎明，仲有小齊、徐若瑄同埋廖啟智，但講到外形最爆，就梗係Leon啦！
佢成面鬍鬚，份人又暴躁，仲經常用陰招向疑犯逼供，喺警隊界出名變態；當中記者最愛的一幕，講佢同疑匪駁火，由平台打到室內，再跌落灣仔大街，動作場口勁多。此外小記更被智叔嚇一跳，唔係佢個Look超爆，而係佢把口爛到爆，幾乎句句都有助語詞，粗口橫飛！如果係三級都好正常，之但係全片來來去去，點解就只得一個智叔識講粗口，其他角色個個都係斯斯文文呢？感覺真係好古怪！
畫面偏濃小齊兩把聲
雖然呢套片推出咗Blu-ray版，但係咪代表畫質好Sharp，音效勁到似現場還原，咁就留番大家自行判斷。但以警匪片嚟講，《火龍》整體畫面似乎顏色偏深，尤其黎明嘅膚色好似特別深沉，而到入夜，黑位細節更唔見晒，究竟係刻意營造抑或技術性問題，咁就不得而知。個人認為最懸疑算係小齊把聲識得分身，廣東話時用配音員把聲，國語時又用番自己把聲，音量仲時大時細，好唔穩定；又例如一場槍戰戲，明明發生喺酒樓，但竟出現類似教堂內傳出嘅回音，聽落有啲怪。
火龍可治瘟疫
齋睇劇情你可能當佢係一般兵捉賊故事，話說黎明同小齊係警隊同事，點知慢慢顯露各自私心，仲搞到唔係你死就係我亡。導演女話，舞火龍唔單止係本港傳統習俗，佢仲可以治瘟疫，套落劇情，意思係利用火龍嚟拯救兩人嘅心魔，你話係咪好玄呢！
$89（DVD）/$149（Blu-ray）
