香港第一次公投今日舉行，想參與創造歷史好簡單，今日去票站投票就得，唔好學特首煲呔曾同其他高官咁逃避公民責任。雖然未有選舉結果，不過唔同機構做嘅民調都顯示，五個辭職議員當選應該打風都打唔甩，相信唔會出現英國大選嘅懸峙局面，如冇意外，五個議員最快星期三就可以重返立法會宣誓就職。
07年立法會補選在12月3日舉行，陳方安生當選後隨即在12月6日宣誓就任，如果政府唔搞小動作，未來兩日內將今次補選結果刊憲，五個當選者就可以在今個星期三立法會宣誓。08年社民連三子宣誓時都有在誓言內「加料」，讀完宣言後加上「權力歸於人民」、「中華人民萬歲」、「打倒官商勾結」等口號，今年再次宣誓，相信都唔會平平淡淡例行公事，提及公投、起義字眼都好正常。
將質問林公公 煲呔曾
幾個月前公、社兩黨五人辭職，保皇黨玩離場導致流會，令五人不能讀出辭職宣言，今次宣誓就職會出現甚麼場面，會唔會有人再使陰招，八方難以估計，不過選情逐漸明朗嘅黃毓民，噚日忍唔住口，事先張揚發表當選宣言，表示重返立法會之後，第一件會做嘅事，就係為市民發聲數臭林公公同埋煲呔曾，佢話成班高官都唔投票，日後有機會就會質問佢哋，憑乜杯葛打壓公投。
要選出代表我們的人
毓民之前揚言重返立法會後，會號召支持者到中環包圍立法會，迫使政府收回政改爛方案，否則誓不罷休，佢噚日又有新搞作，透露唔少支持者已經蓄勢待發，一旦社民連三子高票當選，fans就會製作一幅超巨型Banner高懸立法會外，「紅衫軍」迎接三子以《未來戰士》姿態強勢回歸，橫額上會狂書：「驚都冇用，社民連又嚟喇！」
過去幾個月，立法會少了社民連三子聲音，確係悶局連場，佢哋重返議會，保皇黨、高官真係驚都冇用，曾蔭權不代表我們，我們就用選票選出代表我們的人。