今日投票日，選舉事務處批准兩個機構做票站調查，分別係港大民意研究計劃同香港研究協會，前者今日會喺五大選區其中42個票站做調查，調查員會着制服，即係一件印有「HKUPOP港大民研」嘅背心，方便識別。
港大民研今次做票站調查幾高科技，得到BlackBerry支持，調查員以黑莓智能手機做調查後，可以即收數據透過BlackBerryWidget開發嘅程式傳返總部。有建制派背景嘅香港研究協會則在40個票站做民調，稱數據用作學術研究同公共政策研究。《蘋果》今日都派人喺票站附近做簡單問卷調查，大家見到八方啲同事，請多多支持。