Riseandriseagainuntillambsbecomelions.起來，再起來，直至綿羊進化成獅子。電影《俠盜．驕雄》這句對白，最能反映不斷受打壓，不斷向前衝的香港人民力量。這一天，我們不再是任由宰割的小綿羊，我們要做獅子山下的一頭勇獅，面對強權毋所畏懼。
03年7.1，香港人用勇氣和汗水推翻惡法，換來一片青天。5.16，同一天空下，同一個理念，我們又再站起來，用智慧和選票，宣示人民力量。
記者：雷子樂、張嘉雯、蔡元貴、白琳、袁慧妍、許偉賢
「20年，足夠做些甚麼？」年輕學者梁啟智一夜未眠，驚覺中國推翻帝制、抗日勝利、建立共和，以至香港回歸都不需20年，小島上的雙普選卻居然歷兩代人仍未辦到，隨時成為近代史的異數。一直猶豫5.16是否投票的他，被朋友的一句話觸動，「冇票嘅人想投票，有票嘅人反而猶豫投唔投票。」「今次投票唔係淨係為香港，仲係為中國，我識好多內地人，成世都冇投過票，我家諗件事係好簡單，就係『公民責任』四個字。」
任教香港大學地理系及嶺南大學文化研究系的梁啟智幾日前忽發奇想，製作了短片《一些關於時間的思考》，片長不足三分鐘，沒有名人撐場、沒有半格動畫，甚至沒有一張相片，卻瞬間傳遍網絡。
孫中山、毛澤東 操之過急？
一張又一張的黑底白字畫面，告訴你原來興中會在香港成立到推翻滿清，只用了17年；九一八事變到日本投降，不過14年；由「二萬五千里長征」，到中華人民共和國建立，只是15年；由中英簽訂聯合聲明到香港回歸，只有13年。事實擺在眼前，實現普選竟比推翻帝制要難、比抗戰勝利要難、比建立共和、比香港回歸都要難。
梁啟智直言，這件事令他非常不明所以，於是「黐起條筋」，在四小時內以「低技術」製成短片，給朋友過目後就發佈，「段片完全無技術可言，嚴格嚟講只係slideshow（幻燈片展示）。我唔揀啲共產黨唔認可嘅嘢出嚟，四件都係共產黨認可嘅事，我係唔明點解20年都搞唔掂呢單嘢，所以擺條問題出嚟等大家諗吓。」
「我覺得其他嘢都可以拗、可以討論，我唔介意討論。你話個選舉方法要點，要做到真正均衡參與又好，呢啲都可以傾，但係如果你話畀我聽香港人未ready（準備好），咁你收工啦你，呢個世界冇一個改革係ready先至做，咁你係咪鬧緊孫中山、毛澤東操之過急先？係咪自相矛盾呢？特首曾蔭權話香港人未有共識，所以唔好做呢樣嘢，咁佢有冇返去滿清嗰度，訪問晒中國同胞問佢哋有共識（推翻帝制）未？冇吖嘛。」
冇票想投票 有票反猶豫
他直言自己的政見較身邊朋友保守，對於公投，一直未想通是否有效，「不過有句說話我朋友講，好觸動我嘅，就係『冇票嘅人想投票，有票嘅人反而猶豫投唔投票』，今次投票唔係淨係為香港，仲係為中國，我識好多內地人，成世都冇投過票。我家諗件事係好簡單，就係『公民責任』四個字，如果你唔鍾意嗰幾條友，你咪選第二個囉。」
對於巿民擔心投票被錯誤解讀，他認為毋須多慮，「你喺任何一次選舉，都會有人將個行為用另一個方法解讀o架，你使鬼理佢啫。正如我哋7.1遊行，我哋會唔會擔心去咗之後又俾人騎劫呀？你去你就去o架啦，你有嘢想講吖嘛。」
《一些關於時間的思考》短片網址：
http://www.youtube.com/watch?v=3DgSiKNYZLI