曾失去自由，倍覺民主可貴。78歲的郭矢賢，年少時為保家園，曾把荷槍實彈的國、共軍隊打得落花流水。中共建政後他被屈、被鬥，吃盡苦頭，看透獨裁統治的陰險奸詐。暮年戰士，5.16會再為自由而戰，手執的武器，已由槍枝變成選票。
郭伯伯居於深水埗舊唐樓，每次出入都要撐足九層樓梯。今天的五區補選，他說再辛苦都「一定要投票！」基層生活水深火熱，郭伯伯每月只靠1000元生果金過活，深知民主、幸福要靠自己。「以前老人家搭車冇半費o架，都係大家爭取返嚟，唔係因為佢咁善心肯畀你o架！」
郭伯伯直言，共產黨治下，香港「苛政猛於虎」。他連珠炮發猛轟小圈子政府、保皇派議員，「佢哋騎喺人民頭上、作威作福、巧立名目、口是心非。口講為市民，話（政改）點樣搞鋪勁，實際上咪為咗自己利益。佢唔衰唔做，整啲乜鬼嘢副局長、（政治）助理。你將啲資源放落老人家睇病度好過啦！」
保皇派議員 作威作福口是心非
保皇派大搞蛇宴旅行團籠絡長者，郭伯伯從不賣賬。「班友根本就搵我哋笨，就算佢畀50萬一張票，養我過世，我都唔選佢哋！」受過共產黨迫害，郭伯伯更覺自由可貴，更堅信選票抗共。他老家在廣東省陽山縣，家族種田織布，算是地方富戶。年輕時正值國共內戰，國民黨、共產黨先後有軍隊要他們繳械，「我哋點都唔肯，咁你軍隊一走咗，邊個保護我哋呀？」
他不就範，共產黨半夜開槍投炸藥狂轟，家族成員死守反抗，「打到佢哋一仆一碌」。
1949年解放後，他被屈是間諜、文革時慘被批鬥，「如果唔係有仔有女，海我都跳咗幾次！」直至1981年他才獲批到香港，重獲自由。郭伯伯的「大江大海」，孕育出對民主的嚮往。
老人家不會天真得以為5.16撐公投，共產黨就會馬上給香港普選，但認為港人若選擇沉默，情況只會更差。「23條如果立到法，第日我哋咁樣傾吓政治，都可能會俾人拉呀！」
郭伯伯不奢望有生之年看到普選，但仍樂觀地說：「我死咗，仲有下一代，下一代仲有下一代……總知有咗普選，邊個為我哋市民咪選佢囉！」