本來凍過水嘅立法會平反六四辯論，噚日終於過關，民主黨何俊仁中籤可以在6月2日提出平反六四議案，擔心唔知如何向華叔交代嘅張文光鬆口氣，話黨友知道好消息後興奮到震，雖然未中過六合彩，但心情「仲開心過中六合彩。」
仁哥之前連續幾次都抽籤不果，令人憂慮今年破壞六四前辯論平反六四議案傳統，如今有驚無險，原來多得會計界議員陳茂波玉成，若非佢退出抽籤，令何俊仁中籤機會增加，平反六四辯論都未必順利提出。
張文光同陳茂波係中大校友，張文光不願透露有冇搵過陳茂波傾呢單嘢，「總之大家唔好為難佢。」陳茂波當選後，去年首次參加立法會六四辯論，被視為建制派嘅佢當日一身黑衣開會，同泛民一齊站立為六四死難者默哀，又對在教科書加入六四事件動議投支持票，發言時指中央政府以槍彈對付手無寸鐵學生不合理，質疑北京仍對六四事件「閃爍其詞」的做法。