一個人知足時的笑容是最燦爛、最純真的，在一次印度探訪之旅，張繼聰（Louis）以鏡頭捕捉到當地人最純真的一面，從大人、小朋友的臉上，他找到快樂的源頭。回港後Louis經常翻看相片，提醒自己快樂本應就是很簡單，知足就會擁有快樂。所以Louis的攝影對象，除了是兒子之外，也愛拍攝其他小朋友，影相亦成為他做善事的一個途徑。Louis希望透過自己探訪時拍下的相片，令更多人知道在世界不同地方，有更多人需要幫忙。細看Louis所拍的照片，就會領會到他的心聲！ 撰文：李珮洳
男人之眼
自從成為父親之後，在張繼聰眼中的事物，已跟從前不一樣，有更重的責任，更大的感恩，令他的世界微妙多變。
開心八卦婆
「我形容佢為最快樂最八卦嘅婆婆，當時我哋拍緊嘢，呢位婆婆睇得好開心，做人開心真係好簡單。我專登tune到後邊啲光咁爆，因為代表佢快樂爆燈。」
垃圾崗天使
「紅磚牆後邊係垃圾崗，個小朋友可能喺度搵到佢好鍾意嘅嘢，露出燦爛笑容。我當時好矛盾，見到佢笑得咁開心我好快樂，但見到佢喺咁嘅環境，我好心酸。」
完美的家庭
「貧民窟嘅居住環境好細，一家人要逼喺幾十呎地方。我見到啲小朋友玩一個爛羽毛球玩足半日，個個都好開心。只要一家人齊齊整整，已經係最完美嘅一件事。」
眼睛說故事
「我一望到呢個小朋友沉鬱嘅眼神令我好震撼，一個小朋友唔應該有呢種眼神，佢好似經歷咗好多嘢咁，可能係佢嘅生活環境令佢咁樣。」
父親印記
「兩年前佢幫我喺手臂上紋咗囝囝個名，呢一日好值得紀念，每次睇番呢張相，就會諗起當日有幾痛，不過作為男人，幾痛都要忍。」
沉思型佬
「佢係朱凌凌成員，平時嘅佢癲癲哋，呢一刻嘅佢好認真喺度諗緊嘢，好有型。」
裸露性情
「佢都係朱凌凌嘅成員，呢張睇到佢最真實嘅一面，因為佢根本唔多鍾意着衫。」
感恩心情
「有一排心情唔好，揸車經過見到個天好靚，於是就影低。細心一諗有乜嘢值得咁唔開心呢，做人最緊要識感恩。」
