電影《熱愛島》噚日喺奧海城搞咗個選角會，現場百幾個參賽者一早到場，有人扮肥姐沈殿霞同林亞珍，真係燕瘦環肥乜都有齊，唔知大家係咪當咗星爺新戲選角，以為一味夠騎呢就入到行呢？
「突出未必一定好」
主角之一嘅影帝任達華都有現身，仲俾參賽者黐實合照，其中身材平平嘅女參賽者蹺實華哥影相，仲胸壓佢嘅手臂，認真厲害。雖然華哥冇份選角，不過佢透露會揀兩男兩女，佢話：「打扮突出未必一定好，最緊要就係內心有團火好似太陽咁熱，仲要自然，同埋睇吓佢哋想唔想演戲。」
電影公司方面話今次除咗去菲律賓小島拍外景，仲會去北京、韓國同澳門，又話有韓國當紅男、女星參演。任達華就話好在今次可以去菲律賓拍外景，順便享受陽光海灘喎！
任達華做完訪問就閃咗，唔知係咪俾參賽者質素嚇走佢呢？現場有聲稱兼職男模特兒嘅參加者袒胸露毛，又有人扮肥姐唱歌，仲有人扮林亞珍講大家都唔識笑嘅笑話，好在今次應該唔係揀主要角色，唔係就真係考驗到任達華嘅演技喇！
