天涯若比鄰，有個消防員喺澳洲唔見咗個仔，要來香港尋親。八方今次好認真，唔係講笑搞gag。澳洲悉尼消防副處長KenThompson愛兒兩年前被人拐走，帶走佢嘅並非標參勒索嘅歹徒，而係Thompson老婆。
妻曾在港工作
據Thompson講，佢太太Melinda兩年多前開始，成日覺得身邊人想害佢。有一日，太太忽然帶走兒子Andrew，仲話以後唔返屋企。事件搞到上法庭，法官聽取警方意見同精神科醫生報告後，下令Melinda馬上交出Andrew，點知Melinda帶埋兒子離開澳洲，下落不明。
Thompson噚日嚟到香港，佢話太太曾經在港工作，估計兩母子可能在此藏身。佢喺一位私家偵探朋友幫助下，要求尖沙嘴一啲商戶幫忙張貼尋人啟事。Thompson話國際刑警都有幫忙搵仔，可惜冇音信。
下一站，Thompson會飛去倫敦，今個月25號係國際失蹤兒童日，佢會喺當日開始，展開為期九個月嘅單車歐遊之旅，唔係觀光散心，而係藉住單車之旅，吸引傳媒同當地群眾注意幫手搵仔。
為了千里尋親，Thompson已提早退休，全力搵仔。