中國Phone　換盤Key色

手機用得耐自然無新鮮感！想經常幫手機換新「色」？你可能會諗到換殼，不過機身會大部咗，而且Out囉！Lenovo新推P50就有新搞作，同樣玩換色，不過佢就玩鍵盤換顏色，跟機有4色Keypad，啱晒好色玩家！

記者：許福合
攝影：陳盛臣
Model：Yu@PureModels

不銹鋼機身

P50賣相玩簡約，直身機雖未見花巧，但手感相當唔錯，強玩不銹鋼機身，硬淨得嚟又得體；2.4"屏幕有240×320解像度，都算係夠用。P50最大賣點係鍵盤可換顏色，例如一拎部機出嚟，用緊寶藍色鍵盤，唔啱心水嘅話就可剝佢落嚟，換上珍珠白、火燄紅及鮮粉紅等其他顏色。不過換鍵盤前記緊先將鍵盤上鎖，事關換上新顏色時，要不斷在鍵盤按壓，好容易會誤按，上鎖就可避免胡亂打出電話。

■不銹鋼機身，唔玩特別花臣，一樣夠靚。

中國水墨畫介面

除鍵盤換色，充滿中國色彩嘅介面亦係P50吸引點！機身內置一個類似中國水墨字畫為圖案嘅主介面，轉換頁面時，仲會有穿透而出嘅效果，而且介面排列亦會由標準圖像介面，轉為充滿詩詞水墨畫風格嘅設計，視覺效果勁正！介面顯示仲可以揀埋字體，內置「方正蘭亭黑體」同「北魏楷體」兩種，尤以前者因為近似毛筆字，配水墨畫介面最襯。P50其他特別功能，包括雙卡雙待、通話錄音、來電過濾及降噪等。