看過兩齣《葉問》電影的觀眾，都會覺得續集動作場面比第一集多，先有演葉問的甄子丹大戰各派師傅，再在圓枱上跟洪金寶飾演的洪拳代表對決，繼而以八斬刀勇戰百人，埋尾繼上集打敗池內博之扮演的日本軍官後，更上一層樓勇挫外國拳王，令不少懷有強烈民族情緒的觀眾看得熱淚盈眶。
不過激情背後，葉問之子葉準師傅話畀你知原來大部份劇情都是子虛烏有，但就如戲中子丹所言：「邊有最好打。」最好打不是最重要，宏揚武德及推廣詠春才是中心思想。 撰文：何永寧
葉問長子葉準師傅作為《葉問2》的顧問，日前在其旺角拳館接受本報專訪時，表示只在首映禮上看過該片，他說：「電影拍得好緊湊，睇票房已經知道受歡迎，我都感到好安慰。今次最好睇係洪金寶，唔只係因為佢嘅武打出色，佢仲拍出一個武術家應有嘅性格。」
「返屋企食飯就唔係真嘅」
對於片中葉問宗師連場大戰，葉準說：「第一集《葉問》真實性大啲，第二套差唔多每一樣講嘅嘢都唔係真。當然我都知道始終係拍戲，好多劇情係加落去，電影係要有高潮至重要。」言談間意有所指，不過好戲還在後頭。
葉準指真實的葉問令人敬仰的地方，不但是武功，還有他的武德及培育下一代的決心，葉準說：「我都係本住推廣詠春拳嘅心態去做顧問，你話第二集幾成真，其實一成都冇。」師傅還開玩笑說：「其實第一集都有好多同真實有出入，現實係日本仔（抗戰）時代我都已經讀中學啦，邊仲會踩住架單車仔睇老竇比武，不過我個角色唔係主角，冇所謂啦。」
古仔可以作，但大前提是父親的性格不容扭曲，葉準認為導演葉偉信有花心思將其父的真性情還原，他說：「佢寫宗師待人以寬嘅性格好真，另外，父親佢從來都冇逼我哋兩兄弟（葉準、葉正）練功夫，只係隨我哋性情喜好。今時今日我兩個仔唔想學，我都冇逼過佢，反而個孫仔好肯學又有天份。」
提到家人，葉問在續集中彈出溫情新金句：「分勝負重要？還是陪家人吃飯重要？」葉準卻又一次反高潮，「戲裏面話到宗師成日返屋企同家人食飯就唔係真嘅，因為父親去咗香港之後，母親都仲留喺佛山，到後來中共成立都冇乜嘢時間喺香港。」
不滿甄子丹擅改父性格
葉準笑言宗師其實也有儒雅的一面，他說：「佢年輕時仲喺赤柱聖士提反讀過書，而且佢為人好幽默。」不過自從電影問世後多了人學詠春，他目前在旺角及沙田開設的武館都有人滿之患，更有不少藝人慕名而至，他說：「未有套戲之前，張繼聰都已經學啦，套戲上咗之後，方力申都有嚟學拳。」
談到甄子丹早前接受訪問時，自言將個人性格加入電影中的葉問角色內，葉準頗有微言地說：「佢乜嘢性格我唔知，佢應該根據劇中人物性格去演，唔應該加自己嘅嘢入去。職業演員就係做戲，將角色性格演出嚟，一個成功藝人應該咁做。」
「一成真都冇」
《葉問2》當中有不少震撼人心的場面，也有不少動人細膩的情節，葉準師傅卻指劇情一成真都冇，以下為片中六大美麗的謊言。
隻身來港夫妻分離
開場之初，葉問帶着妻子（熊黛林飾）及小葉準由佛山南下香港，不過據葉準師傅講，49年時宗師乃隻身來港，他說：「我1924年時都20幾歲，點會係戲裏面個細路仔？而且細佬當時都已經出咗世。因為生活艱難，我哋同母親留喺佛山老家。之後母親係落過嚟香港一次攞身份證，不過49年新中國成立之後，唔可以再自由出入中、港，所以佢都好少落嚟香港，我同細佬就喺62年先正式定居香港，所以電影結尾熊黛林抱住個細路等宗師係戲劇效果。」
單挑群雄犯私鬥罪
戲中講到葉問為了在香港開館授徒，要過五關斬六將向以洪金寶為首的香港師傅挑戰，葉準指戲中這個安排是想表現宗師的武技，現實中並沒發生過，他說：「當時生活係困難，但開館授徒亦唔係乜嘢大事，而且香港法例禁止私鬥，點可以咁大班人打交冇人理。」他又表示就他所知，父親甚少跟人講手，他說：「宗師最多都係同其他師傅切磋武功，唔會真係比武，佢服人嘅地方除咗武功之外係佢嘅武德。因為佢名氣大，所以抗戰時係有日本仔搵佢打，不過佢就避而不戰，主要係唔想惹麻煩，始終嗰時俾日本仔統治緊，點可以打贏佢哋。」
黃淳樑非葉問首徒
電影中內地型男黃曉明飾演葉問的大弟子黃樑，片中他先學西洋拳後習詠春，現實中葉問其實在佛山已開館授徒，大弟子是周仲明，黃曉明的角色應該是以現實中有「講手王」之稱的黃淳樑作藍本。
葉準說：「其實首徒唔係黃淳樑或者黃樑，係一位名叫周仲明嘅師兄，因為上一套《葉問》，我哋失散咗幾十年之後見番面。」
李小龍父安排拜師
黃樑在《葉問2》中除被「升呢」為葉問首徒，還帶出另一個重要人物李小龍，葉準卻說：「據我所知，宗師之所以認識李小龍係因為李父嘅原因。」
葉準續說：「李小龍伯爺係粵劇名伶李海泉，喺佛山已經同宗師好熟，嚟到香港之後由李海泉介紹佢個仔拜師，同戲中嘅黃樑無關。」
甄子丹詠春唔正宗
葉問在第一集一打十，第二集更昇華到魚欄力敵百人，當中所用的八斬刀的確是詠春技藝，現實中卻並無魚欄開片其事，葉準師傅更踢爆戲中甄子丹所用的功夫，更非全是詠春手法。
葉準說：「好多師兄弟都睇得出，戲裏面好多甄子丹用嘅武功都唔係十足十嘅詠春手法。基本上場場都有啲，好難話邊一場，可能佢哋拍嘅時候覺得好睇，不過練咗幾十年一睇就知道。」
戰英拳王做戲咁做
《葉問2》重頭戲無疑是大戰英國拳王的一場，令不少人看得血脈沸騰，喚起久違的民族情懷，但這一幕也毫無疑問是因情做景，葉準師傅承認當時的英國人非常霸道，但其父從沒與英國人對決，他說：「之前都講過香港禁止私鬥，我記憶中唯一一次公開比武，係當時白鶴派一位師傅同一位太極師傅決鬥，都要走到澳門打，結果係打成平手。」
