記協一年一度籌款晚宴JABall噚晚舉行，今年主禮嘉賓係終審法院首席法官李國能，李官10年前做過JABall嘉賓，今次可能係佢退休前屈指可數公開活動之一。李官笑言記協問佢係咪好珍惜freespeech（言論自由），係就應該做嘉賓，李官一口應承，原來上台係要freespeech（免費演講）。
每日睇法庭新聞同評論
李官噚晚致辭時話，法官同記者工作相似，都係要獨立、有良好操守同為公眾服務，佢每日都有睇法庭新聞同評論，有時亦會傳閱畀其他法官，等佢哋知道公眾意見。去年法庭新聞多姿多采，小甜甜世紀爭產案成為全港八卦焦點，李官噚晚讚揚法庭新聞一般都好準確，評論普遍而言都好中肯持平，退休後會有更多時間睇一般嚟講都好準確同中肯嘅報道，好多人會心微笑。
JABall高潮係籌款環節，醫管局主席胡定旭同民政局副局長許曉暉合唱《帝女花》。主持人李鵬飛搵其他副局長同政治助理贊助，當係回饋社會。點知成班高薪副局、政助你眼望我眼冇反應。另一主持前高官葉澍堃打圓場，話隨量就得，都係冇人有表示，結果飛哥指令副局每人捐10,000，政助5,000元，全場記者歡呼，有啲人卻面黑，似乎不甘被屈。
民政局常秘楊立門獻唱
拍賣方面，前局長馬時亨、港鐵同市建局合共以10萬元投得方蘇畫作《九十年代董事局》，亞視蔡老闆出價10萬元投得港隊紀念足球，莎莎郭少明以10萬元投得好年份紅酒，南華班主羅傑承一擲12萬元，買下掛喺李官辦公室11年嘅一幅畫。幅畫係李官多年前做善事購下，今次捐出為記協籌款，別具意義。
AO歌王、民政局常秘楊立門唱AirSupply名曲《AllOutofLove》，商務局副局長蘇錦樑鋼琴伴奏，人人聽出耳油。記者高志輝、梁家權棟篤笑都好精采，佢哋話見錢開眼，歡迎政黨買下時段請佢哋表演。
mailto:[email protected]
