周五07/05
友賽撐場喜和局
國際友賽開始充撐場面，有得睇當然可以作為世界盃前功課。不過好似聽朝場墨西哥波，時間又唔好，又冇軍情，求其小注好分嘅和局，不失為無聊中又唔怕倒小小落海嘅一注。
閒贏指數：☆☆
周六08/05
小休外遊避過一劫
小休唔喺香港，唔知原來跟開嘅日本波爆到七彩，避開一劫；只知一早休假前，選定重注嘅黑池作重心之選搞掂，其他唔貪心嘅單W包括列斯聯同米禾爾都驚險地開到；再一次證明，自己強邊瓣，就應該加注，其他嘅玩吓就算咯，今次幫補到啲旅費咯。
閒贏指數：☆☆☆
周日09/05
英超精華正到飛起
英國波大日子，有幸置身其中，雖然無法參與爭標，但到咗今天來到仍然興奮莫名。
眾列強齊大勝對手，雖然主客和賠率雞肋，但能夠善用各不同投注種類，總可以提升回報率。我在英國，就下注了（scorecast）艾沙維首球加阿仙奴贏4:0，4:1，結果有幸靠下半場小兵前仆後繼，開到個4:0，有25倍，小注買吓不知幾過癮；但大注賭3強車仔、曼聯同阿仙奴嘅球迷，也晨早就奠定勝局排定隊收錢。最high嘅梗係球隊大炒8粒嘅車仔球迷嘞，恭喜與我同行嘅好友。BBC喺當晚10點半，就即做了個由名宿連尼加主持，漢臣同舒利亞做嘉賓嘅英超精華節目，個半鐘正到爆，香港嘅收費電視台真係要借吓鏡。不過最唔鍾意見到杜奧巴爭射12碼，好勝係好，但自私爭功，將個人榮辱放在車仔爭標之上，大失印象分。
閒贏指數：☆☆☆☆☆
周一10/05
懶理港股大起大跌
踏上歸途，開乜波都無理，只知香港股市上周也經歷大起大跌，有時唔係要做鴕鳥，但唔係短炒，唔係買輪，理鬼佢！
閒贏指數：☆
周二11/05
愛隊爭氣捧場未「池」
回到港，夜晚瞓唔着又係捧黑池，結果估唔到勁開客其他，掃走森林入決賽爭升英超。好友們，我呢一兩個月不斷點題嘅愛隊爭氣啩，有實力有氣勢，長期捧場，永不太「遲」。
閒贏指數：☆☆☆
周三12/05
英冠附不遜歐霸決賽
到卡城出場，又忍唔住半夜扭開電視，精采程度不遜歐霸決賽，佢哋輸波但射贏12碼照入決賽，吹脹！
閒贏指數：☆☆
周四13/05
戲碼弱雞瞓覺好過
咁嘅排場點賭得落手，今晚有覺好瞓咯。
閒贏指數：☆
值得跟進球隊：卡城（輸咗出線，有運）、車路士（上仗大炒有疑點）