少女版「民主女神」、名編劇兼導演岸西二女兒周澄，明天將出戰新界東立法會議員補選，為五區公投出力，寫下香港實現真普選的歷史性一頁。岸西雖估計女兒會落敗，但愛女心切的她仍做足工夫，除為女兒準備零食及叮囑她要有充足睡眠外，還準備了藥材靚湯，為明日出征的女兒加油。
為支持五區公投，學聯前秘書長周澄組成「大專2012」參加補選，明天將出戰新界東選區，與長毛梁國雄等對手競逐立法會補選議席。現年23歲的周澄原來是著名編劇兼導演岸西的女兒。
媽媽心聲參選係自由
立法會補選明日殺到埋身，與女兒關係親密的岸西，昨日接受電話訪問時，對女兒參選仍然沒有表態，只說：「冇支持唔支持，好似我鍾意做乜嘢就做，佢都係。總之合法就得，佢都大個，唔使點講。但就會叫佢瞓多啲覺。」她表示對女兒採取放任態度：「唯一驚細路仔去咗一個方向做壞事，或者太夜返咪要理佢。佢參選我唔會特別好驚，呢個係佢嘅自由。」
89年的六四事件，只得3歲的周澄便在岸西的懷中上街遊行，也可算是在社運的薰陶下長大，也促成她日後對政治的觸覺。對於女兒參選，岸西不擔心她落敗，反而怕她會贏：「我有問過佢話你當選咗會點，佢話『當選咗咪做』，不過都有晒心理準備（輸），所以我哋屋企唔存在挫敗感，反而如果佢贏到長毛，先係世界最不幸嘅事。」
周澄撐公投，雖然岸西口口聲聲不擔心女兒，但細微之處已流露慈母本色。她透露打算買女兒喜愛的零食，讓她放鬆面對明天的補選，岸西說：「佢口味成日變，都係薯片、朱古力嗰啲嘢。」鮮有入廚的岸西會準備愛心湯水，她笑說：「都係煲湯，周澄鍾意飲湯，佢自細都好鍾意飲藥材湯，都係淮山杞子嗰類，主要畀佢提吓神。」
岸西明天會盡公民責任到票站投票，但不會到女兒選區打氣，她說：「太遠，佢新界區選，我哋住港島，電話都唔會打，阻住佢咩，佢呢排都好忙。忙到連畢業paper都未交，交唔到咪讀多年出年再嚟，冇嘢係世界末日。」
女兒感激家人撐民主
臨近選舉，周澄心情緊張而且對母親的關懷絲毫不知，她昨日說：「媽咪冇話會特別支持，對於我嘅決定，佢都冇反對，不過到時媽咪應該唔會過嚟打氣，費事俾記者影到。」她自言母親沒有給與太大意見，只間中問問選情，不過相信家中特別是媽咪會支持自己的決定，她說：「雖然媽咪冇主動講，但屋企人唔使講啦，相處咁多年大約知佢哋諗乜嘢，其實家人一向都好支持民主。」
採訪：何永寧
人物誌：才女母親兩奪最佳編劇
現年54歲的岸西原名何碧雯，生於澳門，後來港跟姑姐居住。她曾先後在佳視及無綫擔任節目助理，並為單元劇《七女性》撰寫劇本及參與演出。其後岸西投身公關及廣告界。96年開始全職編劇，更分別憑《甜蜜蜜》及《男人四十》奪得香港電影金像獎最佳編劇。前年岸西還執起導筒，執導《親密》及《月滿軒尼詩》。家庭方面，岸西結過兩次婚，與前夫育有一女，後來跟現任周姓丈夫再婚，再誕下周澄再及另一女兒。
剛烈女兒投入政治活動
被譽為少女版「民主女神」的周澄，現年23歲，中學就讀培僑中學，01年加入支聯會青年組兼任執委，積極參與六四的活動。04年立法會選舉，周澄曾替七一連線助選，07年，她又替公民黨擔任區議會選舉助選義工。其後周澄考入中文大學文化研究系，並擔任學生會外務副會長及學聯秘書長。早前她代表「大專2012」參加補選，打正旗號支持五區公投。周澄的男友為社民連第二屆行政委員曾浚瑛。
公投論壇：普選真的等不了
真的等不了，明天便是立法會五區補選投票日，部份演藝界人士都非常關注，努力爭取香港普選，不論50後導演張堅庭，甚至80後演員黃宗澤，他們都認為香港普選指日可待。
張堅庭：
「我支持普選，因為普選係現代公民責任同義務，香港要爭取普選，唔係單單只為下一代，主要係可以令社會穩定性高啲。周日我會視乎工作安排去投票，我希望選民都支持，呢啲係選民嘅權利。」
彭浩翔：
「我一定會去投票，唔好理佢係咪公投，呢樣嘢唔好理先。立法會議員出缺補選，作為一個公民去投票係佢嘅責任。功能組別代表一小撮人，可以藉呢次補選向佢哋說不！」
林建明：
「當日係補選投票嘅大日子，唔理佢背後嘅意思係補選好定係公投好，作為香港人，作為九龍西選民，我就要盡公民責任去投票。希望嗰日大家香港選民都會出嚟參與投票。」
黃宗澤：
「我都想盡公民責任，不過我唔係好熟悉政治，但臨選前會先做功課，睇好政綱同背景先投。」他說投票的原因是想落實普選，他說：「大家嘅希望都係透過全民公投落實普選。」
