爭普選，可以從家庭出發。黎氏一家三口，各出奇謀撐公投。爸爸四出拍攝公投講座，上載互聯網；媽媽影印宣傳單張，不斷投寄給親友；5.16出生的女兒，不忘在facebook提醒朋友，投票就是最好的生日禮物。
面對大話政權別無他法
香港的家庭，都渴求民主。任職公務員的黎太也不例外，政府講求誠信，她最看不過眼的，是回歸後北京對香港的民主進程一拖再拖。「《基本法》講明一國兩制，但97後都唔係咁。」明明07、08年可實行普選，但一次人大釋法，就拖延了香港的民主路，「咁你不如講明係一國一制！」
她慨嘆政府換了主子，就性情大變，事事迎合上意，放棄了過往堅守的規矩、制度。「好似副局長、政治助理咁，你以前唔會喺出面請個非公務員做咁高層，家咁唔跟常規，會令人有懷疑你係唔係識得佢、畀利益人？」
黎太撐公投，因她認為面對大話政權，港人別無他法。「好似同人捉棋咁，對方行兩步，你先可行一步，人哋可以飛象過河，咁你仲同佢捉十幾年？你係咪懵o架？」
她最初不相信五區公投能夠實現，「冇諗過真係有議員願意先死後生」。如今成事，卻面對政府封殺、傳媒冷待，小市民惟有自行宣傳自救。過去一個月來，她自行影印學者孔誥烽的文章《新民主運動新在那裏》、公民黨「張廿蚊」宣傳單張，四出投寄給親戚朋友，「佢哋應該知道真相，因為傳媒冇報。」
政府推銷的政改爛方案，黎太是公務員也吃不消。「功能組別易請難送，你仲要增加，咁做法我相信到2047，都唔會有普選囉！」不願接受訪問的一家之主黎先生，也身體力行撐公投。上月底，一家三口出席天主教會舉行的公投論壇，黎生拿着攝影機，拍下陳日君樞機撐公投的講話，上載到互聯網。黎先生當時還笑說：「我連大廈個看更都唔放過，叫佢去投票。」
盼朋友投票當生日禮物
25歲的女兒雅琪也說，北京對普選一拖再拖，身邊許多朋友都「等等吓唔再等」，開始上街抗議。五區公投在即，她在facebook呼籲朋友投票。5月16日是她的生日，「我會叫朋友唔使送禮物，去投票就得！」
記者 雷子樂