談民主講普選，李柱銘侃侃而談；但作為創黨主席，說到民主黨，提到終極普選聯盟的談判路線，他卻多次沉思，慎重回應。
「溝通一定要，但行談判路線呢條路係踩鋼線，要高度警覺，要好小心一步一步，尤其家嗰個翻叮方案，紅燈已經亮晒，分分鐘人哋會跣你。唔好俾人賣豬仔，到時兩邊唔到岸，支持民主嘅選民會覺得溫和路線冇成績。」他認為，對政府現在拋出的政改方案，民主黨應高姿態投反對票。
李柱銘早前說，對現在的民主黨感陌生，他解釋：「溝通係重要，但唔需要整個黨大部份人跳入去咁熱衷咁去溝通。我做主席時都有溝通，但唔使咁多人擠落去，家好似有啲行緊前匯點嘅路線。溝通要好小心，因為好易好似流沙咁索咗你落去。我嗰時同佢哋溝通，就冇被流沙吸咗落去。」
年輕人可接好民主棒
最近民主黨副主席單仲偕和中常委馮煒光的文章頗受注目，前者《80後起閧前應先了解「民主」非只得唯一標準》，後者《1.5億搞公投不如賑災》，引起不少年輕人迴響，指為「膠文」。李柱銘坦言，單、馮的論點令他失望，「就係呢啲言行令我擔心，令我覺得唔似以前嘅民主黨。」民主派一直希望年輕人「接好民主棒」，單仲偕卻似乎對80後「起閧」不以為然，李柱銘忍不住幽他一默：「可能單仲偕認為（支棒）佢傳畀你先算畀你，唔係你自己出來攞。」李柱銘認為，「接好民主棒」多年來一直未見實現，現在「開始得」，「好似反高鐵，係佢哋忍無可忍，自己出來」，「如果連年輕人都冇熱忱，個社會好大件事。」
李柱銘說，他不會惡意批評單仲偕、馮煒光等民主黨人，又多次向記者強調，民主黨也動員市民5.16投票。記者問他，有否想過退出民主黨，他斬釘截鐵：「我點解要退出民主黨？或應該帶佢行返正確嘅路。」