要了解國情，唔一定要讀萬卷書，睇吓內地電視劇，同朋友傾吓電話一樣得。港股近日最多「JanetBin」（精甩邊），即日鮮滿場飛，要贏錢最緊要夠「狠」，而最近內地流行一句潮語「蒜你狠」，事關大蒜升得好狠，升幅已勁過豬肉同雞蛋。
過去兩年大蒜批發價升逾100倍，每噸要9000元（人民幣．下同），出口價甚至過萬蚊，最癲時一度由幾毫子炒到10蚊斤。今年內地天氣反常，又有旱災，農作物失收令價格上升好正常，但冇理由升成咁。
生意淡薄，不如賭博，股樓冇得炒連蒜頭都唔放過，炒家一早喺各個大蒜主要生產地向農民掃貨，然後放晒入雪櫃囤積居奇。有報道指去年有廣東炒家以每斤1.5元，一口氣喺山東金鄉買入8000萬元大蒜，以現價計賬面勁賺過億元。
推高通脹迫令加息
中央努力壓通脹，防止投資過熱，但資金「有眼」，在負利率情況下總會四出搵投資機會，今日炒蒜，明天好可能輪到炒大豆、菜等關乎民生嘅商品。食品唔同紅酒，係基本生活必需品，炒風最終會推高通脹，令人行迫不得已加息。
若果通脹最終係由食品價格帶動而迫使央行加息，即係話加息並非因為商業活動加快、經濟好轉而促成，結果令借貸成本上升，令真心做生意嘅無利可圖，屆時廠家們好可能會把心一橫叠埋心水炒炒賣賣。從工業品出廠價格指數（PPI）已可見呢個趨勢，4月按年升6.8%，而通脹升幅只有2.8%，反映喺價格管制同消費力疲弱下，做生意嘅盈利空間正不斷被原料價格蠶食。
要打壓炒風，單靠行政手段同加息唔係最佳辦法，只會衍生更多社會問題。喺呢個咁低息嘅環境下，中央除咗喺政策上配合，更必須從改善營商環境同企業盈利能力出發，等資金循正途搵錢，經濟至可以持續發展。
胡孟青