錢，真係打工仔嘅最大動力！港交所（388）行政總裁李小加，噚日朝早出席第八屆亞太區交易高峯會嗰陣心情勁靚，除咗諗咗個極有水準嘅好答案嚟化解港滬之爭，又向佢嘅前任周文耀阿Paul勁送高帽……乜解究小加咁high？
獲獎7萬股港交所
事緣港交所噚日總共撥出9260萬銀，買咗港交所股票獎勵員工，其中8850萬銀即日買入港交所獎畀97名員工，小加獲得總值900萬蚊嘅股票，以收市價125.9蚊計，大約有7.1萬股；剩番嗰410萬銀，就留畀新入職員工。
同時，港交所將股份嘅授予期由5年縮到3年，即係小加嘅「獎品」，3年之後就可以袋袋平安。唔通小加係因為咁，所以心情咁靚？
小加唔只心情靚，仲好精靈㖭！佢諗到一個雙贏嘅答案，化解港滬交易所之爭嘅問題。佢話，上海股市優勢係可以畀企業更多錢，因為當地市盈率相當高；至於香港股票市場嘅優勢係自由，唔使等又冇配額，一家企業得到財富之後，就會想要更多自由，同樣一家企業除咗想要自由外，亦肯定想賺更多錢。即係點？即係要錢就去上海，要自由就梗係落香港喇！
讚周文耀無做蠢事
至於前任CEO阿Paul響佢心目中係點？小加話，以前唔少投資銀行叫周文耀藉收購其他交易所擴大版圖，當時亦係世界潮流，但Paul全部拒絕，依家回頭一望，好彩佢無做任何蠢事，否則小加就有排執手尾嘞！
李華華
mailto:[email protected]