三個惹火候選人，加一個出位議員，合演一齣選舉論壇癲鳳鬥狂龍鬧劇，展現香港政客水平，影衰香港人。商台節目《在晴朗的一天出發》噚日朝早舉行九西、九東選舉論壇。輪到黃毓民發言時，佢慣性手指指質問另一候選人白姐姐「憑乜嘢踢走我？」又話「你老公（謝偉俊）喺立法會參加建制派，得少少票，然後可以佔多數將我哋呢啲有民意基礎嘅人掃帚出去，有咁嘅道理都有？」
白姐姐好歹都做過名嘴，反唇相稽，「我憑全香港市民都唔鍾意黃毓民喺議會內掟蕉潑水掃枱，而且無端端搞公投，浪費公帑一億六千萬元，我憑大家都反黃毓民……」黃毓民插嘴反駁，話好多人支持公投；呢個時候，企喺直播室外嘅謝偉俊護妻心切，超人上身衝入直播室，要求毓民唔好再手指篤佢老婆。
硬食波餅表現無奈
現場好多人拍片，從YouTube片段可見，另一候選人林依麗見謝偉俊忽然衝入直播室，隨即拍枱起身，指住謝偉俊起勢鬧，謝則反鬧「你係毓民走狗！」兩人互罵場面失控，好彩到播廣告時間，毓民同林依麗不約而同衝出直播室外走廊搵謝偉俊算賬。
毓民以爆咪聲浪勁鬧謝偉俊，「有乜嘢理由開緊論壇，指住我恐嚇我！」謝不甘被鬧，行前兩步用心口頂撞「兇」毓民；林依麗加入戰團指罵謝偉俊，「你話我係中央嘅走狗、特區政府走狗，我都可以算，但你竟然話我係毓民嘅走狗就唔得。」
講到興起，林依麗突然變身愛美神，最少三次用上身「胸襲」謝偉俊心口、手臂，同時大嗌：「你非禮我啊！你家非禮我呀！」謝偉俊硬食波餅表現無奈，另一候選人蔣世昌做和事佬勸架，反遭謝偉俊推開，「你唔好做架樑。」林依麗此時報警，聲稱謝偉俊涉嫌非禮佢。
今日論壇謝絕閒人
癲鳳狂龍在咪後自由搏擊，兩個主持人楊振耀、黃永冇晒符，論壇再開始時毓民要求商台嚴肅處理事件，林依麗就要商台趕走謝偉俊，又指謝偉俊好離譜，「佢仲暴力過毓民，暴力過長毛，咁立法會玩完。」商台噚晚發聲明，對謝偉俊行徑表示遺憾，今日新界區選舉論壇只准候選人入直播室，支持者、助手閒雜人等只可在大堂等候。
mailto:[email protected]
主角有話說…
「被非禮追究到底」
化身「愛美神」對付謝超人嘅林依麗，噚日下晝仍然未順番條氣，批評謝偉俊擅闖冇教養。
佢噚日向警方報稱被非禮，警方則指係糾紛，雙方同意自行解決。林依麗向八方解釋，因近日身體不適，精神差，所以冇即時要求返警署落簿，但唔代表會放過謝偉俊，揚言追究到底。至於點解要頂撞謝偉俊，佢語焉不詳，只係一味鬧謝偉俊冇規矩。
據白姐姐稱，噚日場大龍鳳，緣於黃毓民在其背脊用手指篤佢所致，林依麗話要講公道話，指毓民雖然坐喺白姐姐後面，但雙方隔咗一張枱，足足有成一米距離，毓民隻手指，冇乜可能篤到白姐姐。
主角有話說…
收回「走狗」呢句話
選舉論壇嘅主角，唔係候選人而係一位議員，謝偉俊果然不負「出位」之名。慘食波餅嘅佢噚日同白姐姐一齊開記者會時表情無奈，話以前都成日同聽眾講，孤男寡女有身體接觸就麻煩，今次真係能醫不自醫。
佢噚日話警員同佢講，報稱非禮事件毋須跟進，由於有片證明佢先係受害者，所以要求林依麗道歉，否則選舉後不排除採取法律行動。謝偉俊解釋，一時衝動衝入直播室，只係擔心黃毓民對白姐姐不利，所以推開門「兩秒鐘」要求主持人黃永維持秩序，佢對受影響人士表示遺憾。謝偉俊又話，願意收回鬧林依麗係黃毓民「走狗」呢句話，但唔會道歉，因為呢個係正確描述。
主角有話說…
老公救美似阿福
同謝偉俊情比金堅嘅白姐姐，噚日下晝召開緊急記者會撐老公，話成件事始作俑者其實係黃毓民，若非毓民喺佢背脊手指指，令謝偉俊誤以為毓民對佢動粗，都唔會搞出呢單嘢。佢更形容謝偉俊情操高尚，好似玉樹捨身救人英雄阿福咁，深入險境救美喎。
自稱係「咪霸」嘅白姐姐又話，佢以前開咪做節目，可以滔滔不絕講幾個鐘頭，喺選舉論壇上卻窒住窒住，若非毓民喺度嘈嘈閉，佢又點會講到甩甩咳咳？
對於林依麗報稱俾謝偉俊非禮，更召警到場，白姐姐噚日開記者會時早有準備，即場播出「胸襲」片段，話公眾眼睛是雪亮的，總之講多無謂，大家睇片啦。
主角有話說…
「謝偉俊要道歉」
黃毓民身為前電台名嘴，商台直播室算係佢半個主場，謝偉俊唔識死硬闖，仲指毓民想對白姐姐動粗。謝偉俊咁講法，當場被毓民鬧到面無人色，批評謝身為立法會議員竟然干擾選舉論壇，「你好蝕底o架！」估唔到毓民話口未完，謝偉俊真係蝕底晒。
謝偉俊干擾候選人，又指罵林依麗係「走狗」，毓民指身為公職人員，謝偉俊應該向公眾道歉。有多次被趕離議事堂經驗嘅毓民話，自己在立法會內掟嘢係政治抗爭，同謝偉俊無規無矩闖入直播室生事不可相提並論，「我被人趕，已經係懲罰，你呢？你要道歉呀！」
毓民噚日發表聲明，要求商台解釋點解會發生擅闖直播室事件。
