張栢芝前晚剖腹誕下第二胎，多添一個兒子的謝霆鋒隨即徹夜陪伴妻兒。昨日謝家繼續拉隊探望栢芝母子，兩老謝賢（四哥）和狄波拉風騷到震，拖埋阿姐汪明荃睇大鼻肥B。四哥更親煲木瓜魚湯讓新抱谷奶哺乳，又形容新抱似生仔機器，被拉姑睇好她可生8個，故他會囑霆鋒餵老婆食多仔丸，務求為謝家開枝散葉。
本月底滿30歲的張栢芝為謝家三年抱兩，前晚她在養和醫院剖腹誕下第二胎，丈夫謝霆鋒與雙親謝賢及狄波拉、妹妹謝婷婷和囝囝Lucas等齊見證7.4磅的小肥B出世。謝家兩老為再度抱孫喜不自勝，四哥昨接受商台訪問時便對新抱讚不絕口，指她產後龍精虎猛，認為她可為謝家再添孫仔孫女。
細佬面圓謝家鼻
四哥在訪問中說：「呢個新抱好厲害，生完好精神，我問過佢痛唔痛，佢話唔痛，真係好嘢，似生仔機器。佢話會繼續生，生得幾多就幾多。其實生就佢生，教就大件事，因為家庭教育好重要。」四哥前晚第一眼見到第二位孫仔時雀躍不已，他笑說：「當姑娘抱BB出嚟，我同拉姑都有抱，又影咗一陣相。佢好乾淨、光光滑滑肥嘟嘟，有謝家嘅鼻。佢比Lucas重，當日Lucas出世似檸檬。」他指Lucas兄弟不似樣，細佬面較圓。
第二名孫仔才剛出世，四哥卻爆拉姑曾稱栢芝可於40歲前生8個，四哥說：「希望自己可以擺耐啲，人梗係要行呢條路，但有咁多孫延續謝家精神。我冇諗過抱幾多個孫，但呢個新抱，絕！我錫到佢暈。」他又自爆恨抱孫的心情：「如果佢再生最好係龍鳳胎，叫阿仔畀新抱食多仔丸。栢芝好錫我個仔，個仔又錫佢，兒女開心我就好安慰。」
兩老開心做阿四
霆鋒要照顧老婆，兩老不知多樂意充任家中阿四，四哥笑說：「我同拉姑做咗保母，帶Lucas去食嘢，遲啲可能幫手洗衫洗尿片。」談到霆鋒，四哥謂：「佢去搵錢養仔，老竇養仔、仔養仔。我會盡老爺嘅責任，遲啲會搵高手教我煮嘢畀新抱。」其後本報記者致電四哥，提到他想栢芝生8個時，他笑說：「都要問栢芝嘅，你估豬乸咩？我有煲木瓜魚湯畀佢飲，我親自去街市買材料，產婦要谷奶餵奶吖嘛。」BB出世頓成謝家焦點，未知四哥有否買禮物Lucas？他卻說：「佢嘅玩具多過我身家呀。」。之前四哥曾批Lucas入硬娛樂圈，他會否考慮組謝氏演藝團？四哥說，「到我管咩？孫大孫世界。」
阿姐：BB好得意
栢芝前晚產後，霆鋒老友郭偉亮（EricKwok）曾探望栢芝母子，他昨於尖沙嘴出席活動時指栢芝十分精神：「我未見過生完可以咁龍精虎猛，好似啱啱去完廁所咁。」問到BB似栢芝還是霆鋒時，他笑謂說：「佢個鼻好大，拉姑話BB好靚仔。」至於霆鋒就通宵陪伴妻兒，Lucas前晚睇完細佬後由姨媽戴碧芝抱走時，問他覺得BB是否很得意？他即點點頭，十分有趣。
昨午拉姑與丈夫鬍鬚Kong、婷婷和男友安志杰又偕同汪明荃齊到醫院，楊受成夫婦也到場賀霆鋒添丁。婷婷手拎一袋禮物，拉姑就笑到見牙唔見眼，隨後四哥單拖到，同樣風騷到震，問他有否用手機拍下BB照片？四哥即扮㩒電話，然後說：「冇喎。」半小時後四哥離開，他主動說：「栢芝好精神，佢喺房飲緊湯，BB好似我，真o架！」阿姐就說：「BB好得意。」霆鋒助手表示待BB收水後或發放照片。
拉姑晚上8時多離開醫院時表示，暫未知新抱何時出院，但霆鋒和Lucas昨晚會陪伴栢芝，她笑說：「BB未改名，暫時叫佢做二少爺先。」
採訪：藍文浩、王連連、卓寶花
攝影：仇志德、陳俊強
資料庫：霆鋒童年靚仔活潑
張栢芝前晚為霆鋒誕下第二胎，興奮莫名的四哥即大讚乖孫有「謝家嘅鼻」，又形容他靚到不得了，只是跟哥哥Lucas不太似樣。事實上Lucas07年出世時，面形較尖，雙眼精靈，兩邊面更有酒渦，比較像母親栢芝。至於謝霆鋒年幼時也相當討人歡喜，除「謝家鼻」之外，活潑好動也是謝家的優良血統。
