近日忙緊拍無綫新劇《怒火街頭》嘅胡杏兒同鄭嘉穎，噚日喺深水埗一座舊樓天台拍一場談情戲，故事講飾演律師嘅杏兒，因為輸咗官司唔開心，所以扮演佢男友嘅鄭嘉穎日光日白喺天台同佢飲酒談心事，情到濃時仲攬住咀嘴！
雖然杏兒同嘉穎唔係第一次拍咀戲，上次拍《烈火雄心3》嗰陣已經試過，不過埋位前見杏兒都表現得有啲尷尬同埋面紅紅，嘉穎就扮「萬寧妹妹」王允祈喺廣告講嘅對白，對住杏兒話：「我有少少鍾意咗你。」用搞笑嚟緩和吓啲氣氛，最後咀戲總算順利拍完。
事後問嘉穎日光日白拍咀戲有冇唔慣？嘉穎笑住話：「呢啲嘢冇分時間喎！情到濃時自然會錫，好正常。」跟住又問嘉穎錫杏兒嗰陣有冇諗起杏兒嘅男朋友黃宗澤？嘉穎就話：「點會呀，我哋都係為工作，我同杏兒仲有場床上戲，但係未知有幾激。」
杏兒驚拍床上戲
至於一直面紅紅嘅杏兒就話因為現場有好多人睇住，所以覺得有啲尷尬，不過佢事前都刷咗牙同食薄荷糖除口氣。講到佢遲啲要同嘉穎拍嘅床上戲，杏兒都話有啲擔心，因為佢以前都好少拍呢啲咁親密嘅戲，而且聽講又要挨住嘉穎，馮仁昭趁機問係咪擔心嘉穎唔夠黃宗澤咁好挨？杏兒就大發嬌嗔話：「我以前都挨過好多人，唔只佢（黃宗澤）一個。」