夏天又到，係時候keep吓fit，如果唔係點樣着三點式去沙灘show吓quali，最弊梗係的唔起心肝跑步踩單車。小妹早幾日同飛利浦行政總裁Wiebo食飯，佢話今年Philips走健康產品路線，首次推出專為女仔而設嘅便攜運動監察裝置Activa，size好似一般手錶錶面咁大，連埋耳機，可以綁住手臂一邊跑步、踩單車，一邊聽歌。
咁有乜咁特別？客戶服務巿場經理Marcus解釋話，一般女性做運動嘅意識、積極性都會比男性薄弱，呢部運動監察器專為香港女性設計，內置咗TempoMusic技術，可以分析載入部機嘅歌曲，記下每首歌嘅拍子特色，喺踩單車或跑步嗰陣，部機會根據使用者嘅運動步伐，自動挑選啱節奏嘅歌播放，跑步嗰陣就會投入啲，「warmup慢跑會播啲輕快歌，跑快啲就播勁歌。」
可監察卡路里消耗量
監察器又會因應用者要求制訂訓練計劃，設定每次跑步長短，監察卡路里消耗量等。Marcus話，部機有語音提示，提醒啲港女跑了多少公里，消耗咗幾多卡路里，激勵佢哋繼續跑，「可以選擇男聲或女聲，語氣惡啲或溫柔啲都得。」
Marcus又話，部機附軟件連接電腦，將使用者嘅運動數據傳送到電腦。Marcus講得咁高興，鬼妹仔Caroline即場示範戴住Activa踩單車，隨住音樂跑快跑慢，流晒汗好鬼sexy。我都好想操到佢咁fit。部機賣價1,000幾蚊。
電郵：mailto:[email protected]