5月1日勞動節，5月21日佛誕，香港打工仔五月天就只有兩日公眾假期。然而每日OT通頂補鐘遲走，都市人得閒死唔得閒病，請病假「唞唞」，老細同事又單單打打，結果積落一身疲累不快外加都市病。香港藝術家阿金（鄭怡敏），兩年前忽發奇想，自訂5月13日為「國際請病假日」，提議都市工蟻請一天病假，讓身心小休再上路，香港人，你敢不敢和你公司玩命？
戶外寫生 紓緩情緒
5.13在歷史上是廢除勞役的日子，1888年巴西人憑《黃金法》廢除農奴制，101年後柴玲於天安門廣場念起「絕食書」。今日你我不是奴隸，卻同樣為生活在職場營營役役。本身是藝術策劃人的阿金，兩年前主辦了一個名為《請病假》的藝術展覽，剖析「請病假」與都市人的關係，「嗰時又咁啱見到有空姐為咗勞工假同公司有糾紛，於是就諗，呀！係咪應該都有一個國際請病假日，畀我哋去調節身心。」
結果，本地製造的自家品牌，成為阿金一家與朋友的每年節慶，過去兩年5.13，一行不多於10人都會聚集在西九文化區的海濱長廊，阿金與妻子憑海寫生，朋友則沿岸垂釣，貫徹「有病就紓緩病情，冇病就陶冶性情」宗旨，「我哋揀戶外畫畫，因為可以畀大家來一次心理同情緒治療；我哋畀小朋友畫畫，有時都係想佢哋學吓心境平靜。」
請假日踏入第三年，一家三口昨日一如以往走到西九，夫妻二人白天要教畫，當然需要請病假。阿金太太Clara說，讀幼稚園的女兒同樣要請假，「我同佢老師講，話今日係國際請病假日，我一定要幫佢請假，老師望望我，笑住話冇問題，最緊要唔好畀校長知！」
波蘭小鎮 有人響應
潮人愛facebook，阿金同樣於fb上開了event，叫大家參與今年的請病假日。結果77人說會參加，昨日一小時內，只有阿金一家與朋友合共四人請病假到場，阿金說不介意：「冇法子，要請病假都唔係易事。希望10年後5.13，海旁會企滿人。」
記者既不得閒死，亦不得閒病。國際請病假日，本人萬事俱備，就只欠一張醫生紙與被炒的勇氣，反而遠在波蘭北部城鎮索波特（Sopot）的珠寶設計師KarolinaAnnaMatea卻遙遙響應，呼籲當地冇時間又冇錢的波蘭人請一日病假，接觸藝術。
記者 夏志禮