何超儀自資開設電影公司，對創業頭炮《維多利亞壹號》自然非常着緊，所以當她看到電影粗剪版時即表現緊張，導致導演彭浩翔日前也在blog上取笑她「唔識嘢」。其實超儀早前接受訪問時，也承認當時有點失控，不過她投資3,000萬當然不想有任何閃失，全力投入拍攝的她除殺得盡力，更搏盡任陳奕迅又咀又摷。
何超儀早前為自資自演的新片《維多利亞壹號》接受訪問時，甫開始即自爆當初因太緊張而跟導演產生誤會，她說：「始終係我第一部咁大投資嘅電影，又係公司創業作，所以比較緊張，家我對出嚟嘅版本好滿意。」
拍偷情戲自由發揮
超儀直認當初表現緊張的最大原因是擔心蝕本，她說：「當然擔心會蝕本，三級片又冇內地市場，不過同導演彭浩翔傾完之後，發覺我哋原來都係同一類人，衝動蓋過一切，所以拍之前冇諗咁多拍咗至算。到拍完套戲家賣埋埠，成績好好，仲有外國片商想買版權翻拍，回本應該冇問題。」
為了這部創業作，超儀可謂用盡人情牌，找來陳奕迅（Eason）等一班好友客串，也是她與Eason繼電影《豪情》後再演一對，她說：「喺戲裏面我做佢情婦，有一場係講我哋去開房，跟住佢向我又咀又摷，其實劇本冇寫，但係導演拍拍吓，覺得一男一女偷情應該要有嘅，我就任由Eason鍾意做乜就做乜，Eason仲講笑話如果導演再唔叫cut，佢打算伸埋條脷過嚟。」不過她笑言為了《維》片即使蝕底給Eason也在所不惜。
Juno殺人不成反被殺
此外，超儀表示能開拍《維》片，還要感謝在片中客串警察一角的麥浚龍（Juno），原來彭浩翔最初屬意由Juno飾演變態殺手角色，Juno笑說：「我唔介意，我同超儀係好朋友，係我介紹佢同彭浩翔識，之後佢哋兩個一拍即合。」Juno又笑言想不到超儀安排他在片中被子彈爆頭爆口而死來報答他。
採訪：何永寧 攝影：林德雄