香港研究協會本月初以電話訪問咗2,500幾名選民，三成六人話5.16會投票，41%人唔投票，調查又顯示五個辭職議員可重返立法會，其他騎呢候選人就弊啲，該會指根據民調數據，估計有15個候選人得票低於百分之五。
李振雄認輸
要有5%得票率唔容易，攞到3%都有難度，當局規定得票最少百分之三，先可獲發還5萬蚊選舉按金，如果呢班候選人得票真係咁慘淡，庫房分分鐘可以一次過沒收75萬元。
雖然未到投票日，港島區5號候選人李振雄已打定輸數，更發表咗落選宣言，主要內容係批評VTC管理不善，同時要求選管會豁免沒收佢5萬元選舉按金，因為選舉論壇安排對佢唔公平，會影響其得票。
李振雄噚日同八方講，雖然快到5.16投票日，但行出街「人人當我透明，唔知有冇信心攞到3%選票」，自嘆「太儍太天真」參選，還望選管會法外開恩，「我係退休人士，冇埋呢幾萬蚊，冇飯食o架嘞。」