見到家陣樓市搞成咁,做過業主及樓市活躍人士可謂睇到都眼寃!輿論話發展商杯葛日前賣地?你話係就係?有無證據先?香港係自由社會,入場買嘢,價錢唔啱心水,或者睇唔通前景咪唔出手。咁都要罵,反映社會真係好有問題。
豪宅市場幾時再會出現天價成交?呢個環境之下無人敢預測。港股昨日牛皮偏軟,成交量唔夠600億元;不過,早前獲周星馳入主的帝通國際(8220)跑贏大市,股價抽升5.4%,收報0.255元。睇番帝通股價上周五曾跌抵0.2元,惟瞬即回升,走勢更呈大陽燭形態,短線似見底。
星爺以往投資豪宅鋪鋪贏錢,玩股票成績係點?仲要時間檢證,家陣睇落應該有計。帝通今年3月中以3.2億元作價出售尖沙嘴商場「gi」予資本策略(497),幾億銀淨收現金袋袋平安,呢單「刁」令本來無甚負債的帝通變成純現金公司,循以往慣性推斷,變身股內部清理乾淨後,未來係等時機注資,一做呢步,相信星爺人生又出現另一個傳奇。
方星俠