有時，真係唔怪得啲人眷戀前朝。殖民地時代，冇人會怕入投票站；家陣人民當家作主，投票卻變成說不得、做不得嘅事，特首唔會逆阿爺意思，其他高官自然識做，5.16一於田雞過河，各有各蹭，逃避公民責任。
鬍鬚曾俄羅斯訪問
財爺鬍鬚曾聽日出發去上海出席貿發局時裝展，投票日應該身在哈爾濱，可能覺得未夠遠，之後會帶領經貿代表團訪問黑龍江省同俄羅斯，一路北上不回頭，直到22號先返歸。鬍鬚曾去東北，食物及衞生局局長周一嶽則遊遍半個歐洲先回航。
周一嶽今日就起程到愛沙尼亞，在首都塔林考察當地電子健康記錄發展及參觀醫院，之後到慕尼黑參觀德國首間中醫藥診所。5.16佢就犀利咯，會去到日內瓦同中國衞生部部長陳竺會合，一同出席第63屆世界衞生大會，投票？Noway！一場去到歐洲，周一嶽最後要去埋荷蘭、漢諾威同英國，避開10日先返香港。
教育局局長孫公趕得及喺投票日「閃」人，星期日起外訪推介香港教育服務，去邊度推介呢？近近哋去馬來西亞同印尼。教育局話今日會公佈行程。運輸及房屋局局長鄭汝樺都想行開吓，據講有人邀請鄭汝樺去北京出席一個航空業展覽，但由於對方未確實安排，所以暫未作實。
民建聯拉隊過大海
高官趕在5.16前離港，保皇黨更加此地不宜久留，民建聯噚日宣佈星期六、日「着草」過大海，去澳門考察，主席譚耀宗帶隊，多個議員同行共10人成團，會同澳門特首崔世安、立法會主席劉焯華、澳門中聯辦主任白志健會面。為咗招呼呢班補選「逃兵」，真係辛苦晒咁多位馬交朋友。
如果再有多幾個高官離港，下星期特區政府隨時變成離岸政府，特首煲呔同環境局局長邱騰華噚日出席公開活動時，被記者追問星期日投唔投票，兩人充耳不聞匆匆走人。天主教正義和平委員會5.16主日禱文建議教友為補選祈禱，又呼籲教友積極投票，煲呔星期日唔敢去票站，去到聖堂，會如何告解？
mailto:[email protected]