英超聯賽事完結，頭四名係車路士、曼聯、阿仙奴、熱刺，呢四隊參加歐冠盃，五至七名係曼城、阿士東維拉、利物浦，呢三隊有資格參加歐霸盃，降班三隊就係侯城、般尼、樸茨茅夫。
翻查去年八月十九日本欄「英超Big3加3」，當時只係睇完第一輪賽事，就作預測，實在大膽。當日嘅預測啱唔啱呢？咦，唔錯得晒噃。例如講明曼聯、車仔與阿仙奴係爭標隊伍嘅Big3，餘下三隊係熱刺、利物浦與曼城爭第四名，都啱吖，結果熱刺得第四名，當時講利物浦冇咗沙比阿朗素，中場實力下降，與後來表現相符，但落後畀阿士東維拉，就令人失望啲，下季利物浦主將可能下堂求去，謝拉特有消息去曼城，托利斯隨時離隊，如果真係咁，利物浦只堪與富咸爭鋒。至於降班方面，貼中般尼，話明伯明翰有前有後有拼勁，亦啱晒。睇咁多年英超，賭波以英超為主，意甲捧國米，西甲捧巴塞、皇馬，德甲唔理，於是全季埋單，略有收穫。左丁山自認敝鄉，唔識各國乙組賽，更加唔識日本聯賽，不時搭的士聽到的士司機在電話講賭波，口沫橫飛，由維拉利爾至禾夫斯堡至巴勒莫至大阪飛腳，都話買中，只有佩服的份兒，賭波可能增加咗香港球迷嘅國際視野。茶樓夥計，的士司機對西班牙、荷蘭，德國啲城市名字嘅認識，直情熟過左丁山。
賭波還賭波，要知所避忌。咁多世界球賽，點可以次次賭，次次贏呀？內地人連香港足球都賭埋，搞到有內地球員意圖賄賂喀麥隆外援球員，直情係匪夷所思，屬於世界上最笨之事。以左丁山淺見，英超聯球賽最為均真，場場拼盡，即使偶有「做戲」，你都要服佢哋係最佳演員，唔似得意甲不時會出現一啲三流演技。故此英超聯為賭波首選，起碼諗少一瓣先。
咁樣講，並非鼓吹賭博，正如《蘋果日報》體育版嘅賠率版，只係迎合市場啫。一啲人士往往誤會報紙可以宏揚正義，重整道德，其實係天真得滯。市場上有咁多不同思想嘅讀者，報紙點樣可以反潮流呀，只能順勢報導而已，逆勢而行，一定執笠。