陳法蓉與洪欣及孫耀威等一班教徒藝人，將支持下月舉行的佈道會，有指當年陳法蓉被倪震情傷至深，但昨日她談及舊愛已能釋懷，並謂知道倪震與周慧敏夫婦都已信教，也替他們高興。
陳法蓉、洪欣、孫耀威及韓瑪莉等昨日齊集油麻地出席「紅黑皇佈道會2010之衝出紅館邁向全城」記者會，由王祖藍任司儀，大會宣佈將於下月5日及6日於紅館舉行三場，由於門票已售罄，故正籌備在各教會進行即時直播。
「佢兩公婆受咗洗」
陳法蓉信教多年，她謂屆時會與好友蔡少芬一同上台分享見證，她說：「我哋會講真嘢，啲藝人成日俾人覺得生活好繽紛，好多姿多采，其實我哋都有擔憂嘅時候。」其前男友倪震也已信基督教，問到屆時可會有其他藝人出席，陳法蓉大方表示：「唔知呢，我冇問邊個會嚟，不過我知道佢兩公婆受咗洗，都好戥佢哋開心。」
當年有指陳法蓉受倪震的情傷至深，看來她對此事早已釋懷。她又謂正在進修中，故屆時要向學校請假來參加，陳法蓉說：「我想做多啲慈善幫人，所以上緊啲幫助人紓緩情緒嘅課程，家好多身邊人成日話失眠，抒發唔到情緒，我想幫吓人。」是否不再拍戲？陳法蓉說：「唔係，我啱啱喺北京拍完廣告，家睇緊啲劇本。」
孫耀威借酒抒懷
孫耀威則表示會與洪天明拍短片，於佈道會時播放，他說：「我演一個60年代差佬，天明做蠱惑仔，我覺得呢件事好有意義。」女友陳美詩可會參加？孫耀威謂：「唔知，可能會幫手。」是否與女友屬同一教會小組？孫耀威說：「都係，我同MCJin一齊搞咗lightclub，希望帶畀人光明，我哋成日傾偈。」豈不互相知道很多隱私？孫耀威謂：「可以咁講，藝人之間做真心朋友唔易，大家都會保守秘密，唔會亂講，做藝人喺個圈有好多黑暗面係大家唔知，我都試過唔開心要借酒澆愁，但醒咗都解決唔到問題。」他謂不會戒酒，因有時聊天前喝啤酒能幫助放鬆情緒，盡訴心中情。
採訪、攝影：胡比
