功能組別這個名字起得不錯。每當政府需要立法會為政策護航，它就會發揮橡皮圖章的功能；每當政府急需議員候勤，否決最低工資、平反六四動議，它又會發揮勤王功能。這些功能，自然深受政府器重。然而，功能組別的選民又怎樣看？5.16當前，以廢除功能組別作號召的五區公投，不同界別的選民又怎樣抉擇？
記者：蔡元貴 白琳
票站故事：太太拒接選票
（張銳輝 中學教師 教育界選民）
每年立法會選舉，張Sir和太太都去投票。二人都是教育界選民，各有兩票。有一回，張太去到票站，跟票站職員說她不要功能組別那一票，票站職員呆了，不知怎辦，堅持照發功能組別的一張選票給她，還跟她說不想投的話可以投白票。
是一個擁抱小圈子功能組別議席的小圈子政府，造就出這樣荒誕的票站故事。中學教師張銳輝和太太都是教育界選民，卻又不認同少數人主宰多數人的功能組別議席制度。教通識的張Sir說﹕「我上堂教學生人權、平等，喺功能組別制度之下，唔同人有唔同嘅政治權利，如果連我都多我學生、家長一票，我點說服到學生？點說服到自己？」
當了十多年教師，張Sir回歸前已是功能組別選民。老老實實，他也投過教育界一票，「當時嘅考慮係，教育界有民主派代表參選，雖然我唔認同呢個選舉制度，但係可以選出泛民議員做代表，總算有望加快民主步伐。」
身體力行 比一個議席重要
隨着社會氣氛與個人歷練的轉移，張Sir認為，選民身體力行拒絕功能組別，比立法會一個議席重要，「我覺得家已經唔應該再停留喺言論同文章上反對功能組別，我哋應該行多步，以最簡單嘅行動表達對制度嘅不認受。」
張Sir認為，即使教育界不再有泛民代表坐在議事堂，也無損教育界推動民主普選的力量，「冇乜所謂，教協嘅動員能力好大，好似教育界立法會議員張文光咁，佢嘅功能其實唔只限於立法會嘅議席。更何況，功能組別議員根本唔應該只係顧自己界別嘅利益，否則立法會就會淪為分餅仔嘅場地。」
政府認為功能組別可以平衡不同界別利益，張Sir不敢認同，「好多時，某個界別嘅問題並唔單止係功能組別嘅問題，好似教育咁，好多人都有子女，教育政策肯定唔單止係教育界嘅事。」
5.16，張Sir一定去投票，為踢走功能組別、實現真普選表態，「早前普選聯嘅良好意願，都不獲中央受理。我覺得，人民力量有幾大，決定咗權利嘅分佈。如果今次最簡單嘅行動都唔做，以後唔使旨意中央會釋放特權。」
剛才的票站故事還沒有說完，結局是，張太誓死堅持不肯接過那張功能組別選票，驚動票站主任，終於讓她放棄該張選票。有些事，必得堅持下去，結局才會完美。
守則：不得謀取政治利益
（王惠芬 融樂會總幹事 社福界選民）
社會工作者註冊局工作守則指引，有這麼一條：「社工不得運用專業關係謀取政治利益。」偏偏全港數以萬計註冊社工，可以利用自己的專業，在立法會選舉多撈一票。而一直鼓勵慫恿社工違反專業操守的，是倚賴功能組別護航的香港政府。
「功能組別違反咗社工嘅專業核心價值，社工講平等、公義，我哋嘅人權同服務對象唔應該有分別，但係我哋竟然可以多服務對象一票。」專門為少數族裔爭取利益的融樂會總幹事王惠芬，每次投票都跟媽媽一起去，母親只得一張選票，她有兩張。這種感覺，可能會有人覺得很優越，但王惠芬說：「我好唔舒服，我憑乜嘢比身邊嘅人多一票呢？」
如果說社會福利界別議員可以維護社福界利益，王惠芬認為，任何一位議員都可以，「你問我，李卓人、劉慧卿，都一樣關心社福。」她進一步指出，就是「維護業界利益」這面旗幟，說明了功能組別不應存在的理由。
現實：關心選民卻連任失敗
「維護業界利益係功能組別嘅致命傷，就係因為咁，呢班議員往往忽視社會公義。」她舉例說，張超雄在任社福界立法會議員的時候，很關心服務對象的利益，然而「社工界嘅管理階層同前線人員，喺佢競選連任時，好多都冇投佢票，因為張超雄只顧服務對象利益，冇維護到社福機構僱主嘅利益，亦冇關照社工嘅利益。」
註冊社工應以服務對象為先，最終卻因太過堅守本份而失意於界別選舉。如此乖謬、如此變態的選舉制度，王惠芬覺得沒有存在的價值，即使少了一個社工代表在議事堂也在所不惜，「立法會少咗社福界一票，我唔覺係一個好大損失。我哋志願團體、社工一樣可以做游說，我哋唔需要一個咁狹隘嘅代表。你要記住，我哋講緊一個高層次嘅立法機關，唔係區議會，功能組別搞到立法會區議會化，唔係好事。」
王惠芬希望透過5.16一票，高聲呼喚對民主普選的嚮往，大聲疾呼對功能組別的不屑，「好多扶助弱勢社群嘅方案，就係因為功能組別嘅否決而無法通過。呢個不公義嘅選舉制度已經扼殺咗民生，身為社工，好想呢個不公平嘅制度盡快消失，實現雙普選。」
從特首選委變公投義工
（韋志堅 會計界選委 會計界選民）
曾蔭權07年向會計界選委韋志堅拉票，承諾爭取普選。韋手執選委、功能組別及地區直選三張選票，對此卻不以為然，「有得投又點？選完之後曾蔭權影都冇，從來冇同我哋交代過。」眼見畸形政制拖垮經濟，這位「特權階級」走入群眾，做公投運動義工，打倒小圈子選舉，呼籲港人不要靠曾蔭權爭取民主，透過公投直接向中央明志。
韋志堅以banker血淚史反駁「經濟第一，民主其次」的謬論，回歸後商家坐大，力谷政府高地價政策，樓價租金狂升，外資銀行把辦公室遷往廣州、印度，大批資深銀行家被裁，「有啲要減好多人工做番文員，有啲索性全職教打高球。」
07年特首選委會界別分組選舉，任職外資銀行管理層的韋志堅與六名會計師組隊出選。他們支持參選特首的梁家傑，「我喺銀行界有人識，會計界冇人識。會計師選我，係想特首有競爭。」七人知名度不高，卻一同當選。
愛香港，要為香港做啲嘢
韋志堅批評，曾蔭權違反選舉承諾，沒向中央反映港人對民主的實際需要，「中央仲誤以為泛民爭取民主係唔服從中央主權。呢個政制已經影響社會繁榮，我哋需要建立公平制度，解決經濟問題。」他認為公投結果可作為泛民否決政改的民意基礎，既是民主運動的試金石，也可直接向中央表達訴求，「我相信中央明白咗之後會配合，香港唔繁榮，中央實頭痕。」
立法會金融界功能組別選民全是公司票，沒有韋志堅的份兒。他有會計牌，反而是會計界選民，「銀行學會爭取好多年，會員點解冇份投？政府想保住李國寶囉！」身兼公共專業聯盟多元經濟組召集人的韋志堅預計，類似反高鐵的抗爭只會越演越烈，很多爭議性政策不能出台，「監管地產商、醫療融資、銷售稅等政策都有好有唔好，樣樣都有好多人反對，點推？有咗普選，如果你唔鍾意，四年後選舉可以再嘈。」
過去幾個月，韋志堅上班前後、午飯時間都在中環派公投傳單，冷天穿羽絨，熱天穿西裝。人到中年，生活無憂，何苦？「我係可以唔理o架。但我喺呢度出世，長大，我真係愛香港，要為香港做啲嘢。家有能力嘅人唔肯入政府做嘢，覺得有心無力。普選之後，政府可以吸納真正為香港嘅人才。自稱愛國愛港人士淨係聽中央話，為香港做過乜嘢？我唔明佢哋點樣愛香港法。」