茶餐廳升呢　銀河下咬脆豬

創意豈止融於菜式，裝潢花點心思，茶餐廳都可與別不同！近日於尖嘴新開的茶餐廳就以酒店式靚裝，賣平民化菜式，在豪華吊燈下，咬啖豬扒包飲杯靚奶茶，爽！

記者：潘紫芳
攝影：林栢鈞
Model：[email protected]

靚裝速覽

■其中一區以曲折不銹鋼條營造波浪效果。

■另一區又飾以玻璃水珠，感覺明亮。

■懷舊街燈配黃色牆身，如置身澳門街頭。

■門口大吊燈未及酒店名貴，但已夠搶眼。

茶餐廳底酒店裝潢

於尖沙嘴新開業的「澳門皇朝茶餐廳」，甫踏進門口，即被多盞閃令令巨型吊燈閃親！抬頭一望，大門口掛有金色垂直吊燈，不過講到最矚目，還數由門口一直延伸至餐廳盡頭的銀色水晶吊燈，甚有銀河Feel。群燈拱照下，牆壁又怎能光禿禿？餐廳以矮身牆分隔出六個區域，各區飾以不同物料，如不銹鋼、玻璃水珠、木等，營造不同效果，雖沒甚麼花巧主題，有新鮮感搭夠。找負責人Kent一問，得知這些設計概念統統源自澳門的酒店。何解要把酒店裝潢套入茶餐廳？Kent說：「想把本地茶餐廳升級，改變客人對茶餐廳的舊有看法，告訴大家茶餐廳也可以華麗裝潢，侍應也可如酒店服務員一樣親切有禮。」即是想把茶餐廳升呢！不論成功與否，起碼訪問時，鄰桌年輕食客就和Kent說：「盞水晶吊燈好得！」香港人，幾時都貪新鮮，睇嚟突圍有機。不過個人認為，若然食客進來，不是問「先生幾位」而是問「坐甚麼區」，咁咪仲型。

蛋白/蛋黃葡撻$10/兩件

酥皮脆而不散，蛋白餡甜而不膩，絕對要encore，另外還可選蛋黃葡撻呢。

澳門菜式夠地道

餐廳擺明車馬力推澳門菜，不過開業初期，暫時穩守港人熟悉的澳門美食如豬扒包、馬介休等。連在澳門長大的中葡泰混血模特兒Brigida，也指餐廳的燒焗馬介休非常地道，外脆內軟，與澳門吃到的無異。不過個人認為豬扒包較親民，豬仔包烘到脆卜卜，超鬆化，中間豬扒煎得香口爽脆，咬落仲有黑椒香，加埋大量鮮甜洋葱，厚厚一個包令人吃得狼狽卻又滋味無窮。而餐廳為迎合港人口味，亦提供不少港式料理，如各類蒸餸和小吃，推介皇朝蝦多士，炸得香口，合格有餘。

澳門豬扒豬仔包$18

咬落有黑椒香的脆豬可轉方包化身豬扒三文治，又有另一種食法。