被外界形容為史上最薄嘅屏幕觸控手機LGMiniGD880，噚日喺香港新登場。黑色機身配以銀色邊框，型格十足，小妹拎上手，部機輕得嚟好有手感，唔似得其他手機啲邊位咁圓滑，好有佢自己嘅style。
火速上網夠流暢
LG電子巿場總監David話，機身僅厚10.6毫米，以3.2吋多點觸控屏幕嚟計，可謂全球最薄。1,600萬色彩色顯示，配上500萬像素相機，當然係潮人之選。
新機在手，小妹先玩為快，用手指篤一篤，發現部機內置Facebook、Twitter等社交網頁，啱晒我呢啲相識滿天下嘅人。手機支援HSDPA、Wi-Fi連接，仲係LG首部手機採用Phantom網頁瀏覽器，方便潮人火速上網，同時開啟多個網頁，運作都好流暢；即時電郵收發絕無難度，內置GooglePackage可瞬間載入YouTube、Gmail。
David笑笑口話，手機可以無線同LGAirSync伺服器進行同步，將通訊錄等個人資料即時傳輸備份。On-Screen功能則可將手機接上電腦直接控制手機功能，或互相傳送資料。又幾方便喎。唔怪得樂壇天后千嬅噚日都有嚟撐場，佢同小妹講鍾意部機夠薄夠輕，上網速夠快喎。手機下禮拜有得賣，價錢$2,980。
電郵：mailto:[email protected]