唱片公司聯同公開大學開設流行音樂課程，王菀之將會擔任客席講師分享自己當初學音樂製作嘅困難同技巧，佢話今次分享心得可以畀自己重溫當年做新人時心態。若果遇到有潛質嘅創作人，佢亦會向公司推介，不過佢會先挫對方銳氣，因為要令對方明白寫咗一百首歌，可能未必有一首會被取用，同埋要學識接受批評。此外，近來王菀之嘅工作行程排到滿，佢同張敬軒、梁祖堯合作嘅舞台劇《柯廸夫Octave》會喺7月公演，仲話要做埋講師，睇嚟佢有排忙。