大班失狗心急如焚，可是狗海茫茫，真係唔知如何大海撈狗，既然Kobe同財爺鬍鬚曾隻Oliver係兄弟，可能狗有靈犀一點通，有辦法搵番親生細佬出嚟。
「唔見埋仲弊」
大班笑言都唔係冇諗過以狗搵狗，可是兩兄弟出世後分開住，冇乜機會見面，「兩隻嘢基本上冇乜關係」，只係名義上親戚，實際上唔相識，所以打消呢個念頭，「萬一唔見埋鬍鬚曾嗰隻咪仲弊！」
寵物繁殖協會主席韋綺珊同八方講，搵狗關鍵唔係睇隻狗親戚關係，而係隻狗本身性格，「如果隻狗係比較野性，可能專登唔出嚟。」韋綺珊指柴犬性格一般比較獨立，因此派人搵狗都唔係好辦法，「如果隻狗性格好貪玩，可能匿埋咗，你搵佢都唔會出嚟。」
如果Kobe唔係俾人老笠，而係自己走失，似乎唔易搵得番。「睇佢幾時玩夠，自己識返屋企啦。」呢句話，唔好俾大班聽到喎……
日本柴犬由中國傳入
柴犬係日本幾普遍嘅寵物狗，喺香港都好多fans，受電影《柴犬奇蹟物語》熱捧，近年更加紅上加紅。
香港哈日者眾，可能因此鍾意埋柴犬都唔定，其實柴犬乃係「唐狗」，由中國傳入日本，同日本土產紀州犬交配繁殖而成，人離鄉賤，狗離鄉貴。
堪稱明星狗嘅柴犬，都真係幾受明星歡迎，影星呂良偉去年底曾走失柴犬Smart，喺報章刊登尋狗廣告，懸紅10,000蚊搵狗，後來有好心人喺淺水灣沙灘附近見到Smart徘徊馬路邊，即時聯絡呂良偉助手，人狗重逢，據報呂良偉同太太楊小娟見番Smart時歡喜若狂。