大班鄭經翰近日囉囉攣，今年政改方案唔關佢事，毋須再受綑綁問題困擾，新電台遲早大展鴻圖，急都冇用，咁因乜事惆悵呢？之唔係為咗隻狗囉。大班養嘅柴犬Kobe上星期二唔見咗，就係呢隻走狗，令大班牽腸掛肚。
山頂超市門外唔見
住山頂嘅大班講，當日工人如常帶隻狗仔出街，去到超級市場買餸，隨手將隻狗綁喺門外，點知買完嘢出嚟，Kobe就不翼而飛。工人即時行遍山頂搵狗，初時希望Kobe迷途知返，等咗成個星期都冇任何音訊，大班於是發散人喺山頂貼尋狗告示，「有人話見到隻狗自己走咗去，但我覺得俾人偷嘅成份都好高。呢啲狗最弊呢就係人都跟。」
為咗搵番Kobe，大班出賞金999元，佢噚日同八方講，如果真係有人交回Kobe，佢願意畀更多錢，「你想點，話畀我聽就得嘞，999，冇所謂啦，你鍾意美金又好，歐羅又好，到時先講數啦，冇得講價o架嘞。」咁肉緊隻狗，大班話因為養咗佢大約一年，已經當佢係家人，「BB就養大佢，真係有感情，平時喺屋企，成日覺得佢搗亂檔，唔見咗佢就掛住，好似唔見咗個屋企人。」
自責冇盡主人責任
Kobe約一歲大，而且系出名門，同財爺鬍鬚曾養嗰隻Oliver係親生兄弟，Kobe細四個月。大班唔肯透露幾錢買隻狗返嚟，只係話「萬萬聲」要五位數字，「唔係錢嘅問題，係感情問題。」為咗令人放狗歸家，佢講到好心傷，「隻狗閹咗o架嘞，拎去都打唔到種，畀番我好過啦。唔畀番我都唔緊要，最緊要善待隻狗。」
養狗多年嘅大班，除咗柴犬Kobe，家中仲有兩隻魔天使，佢話主要因為三個仔鍾意狗仔，自己亦多個伴，所以養多隻柴犬，今次係第一次失狗，諗起平日冇乜時間同Kobe玩，冇盡主人嘅責任，佢似乎有啲內疚，「如果由我放狗就冇事嘞，所以養狗都係唔可以依賴人，養狗最緊要都係自己照顧隻狗好啲。」
mailto:[email protected]
