西九龍文娛藝術區由西九管理局負責發展，主席係唐英年司長，行政總裁請咗英國人謝卓飛，藝術總監請咗香港藝術發展局行政總裁茹國烈過檔，謝卓飛是香港新人，茹國烈就係本地藝術界老手，文藝界無人不識，可以補英國老外之不足，點解要搵英國人做阿頭呢？陶傑講得好清楚啦，殖民地主義好嘢吖嘛。俗語云：文人相輕，自古已然，於今為烈，從曾蔭權司長推動西九以至今天，已有七、八年，呢幾年間就見盡不少文藝人士相輕，為咗西九，爭拗不斷，越演越烈啦。好久好久之前，左丁山一位老友賓架H被獵頭到某大殖民地銀行當貸款部門主管，點知俾唔少人在背後指手畫腳，話佢唔夠經驗，冇資格坐上高位，賓架H爭取與洋人同級同事一樣住上山頂或中半山，被洋人上層否決，要留在窩打老道山，全無房屋津貼，佢一怒之下不往應聘，個職位幾個月後由一位更年輕，全無本地貸款經驗嘅洋人做咗。咦，冇人出聲噃，班華人下屬唔知幾聽話㖭，年青洋人自然亦住在半山豪宅。昔之視今，猶今之視昔，西九總裁由邊位本地人做，都會有本地文化人左彈右彈，而今請咗英國人做，好似仲未見過有邊位本地文化人發炮！
西九自懷胎十月開始，已飽受傳媒關注，他日嘅企業傳訊、公關事務要由具備豐富經驗嘅人士擔任至得。上星期就聽到，西九管理局請咗有線電視嘅肥佬卡文陳（陳嘉耀）擔任傳訊/公共事務總監，左丁山立即打電話向卡文求證，卡文直認不諱，話即將宣佈，但佢要在世界盃賽事完畢之後，先至會向西九報到，大概係八月啦。咁就恭喜卡文有快樂的第三春，第一春係做《南華早報》記者，第二春係在有線開山劈石，第三春就係到咗臨近退休之年，又有人睇起，搵佢去西九做開荒牛。卡文話：「呢次係做公職，算係為香港人做番一啲事啦，搞起西九，對香港聲譽有良好作用。」豈止聲譽而已，會有實利㖭。香港要成為紐倫港，必須全方位提升競爭力，國際金融中心須有適當之一流非物質配件，就係有文化藝術及精緻娛樂區，例如倫敦WestEnd，紐約百老匯。呢一點幾年前已經聽到曾蔭權政務司長講過嘅嘞，外國報紙如FT、WSJ、IHT不斷報導新加坡建設文化藝術區與賭場，最終目的都係為咗「金融中心爭奪戰」啫，香港西九要搞到好掂至得o架！