TVB記者林子豪玩轉上海世博，喺園區內刻意唔拉背囊拉鏈，測試強國人民同情心同公德心，結果足足23分鐘都冇人提醒佢，義工都當佢透明。好多觀眾睇完呢個報道都拍案叫絕，內地來港讀大學嘅Jack不以為然，認為咁樣測試中國人質素太兒戲，日前去旺角花園街，照辦煮碗測試香港人質素。
應報道客觀事實
結果同喺世博嘅實驗一樣，Jack孭住個冇拉拉鏈背囊喺人來人往街頭廿幾分鐘，冇人叫佢拉上拉鏈。八方噚日搵到Jack，佢強調做測試唔係要證明香港人質素低，亦唔係要反駁內地人質素低這個問題，因為中國人種種醜態，「在內地任何一個火車站也可看到，不奇怪呀！」
佢又話中國人質素一般低於香港人係事實，不過新聞應該報道客觀事實唔係偏見，「這種報道簡直跟江澤民當年說的一樣，toosimple,sometimesnaive。」來港讀書兩年、21歲嘅Jack話，初來港時步步為營，擔心行差踏錯俾人笑佢質素低，好彩冇鬧出大笑話，「我認識的香港人，都非常友善。」
Jack將片段放上網，網民有讚有彈，有人指旺角同世博情況唔同，測試唔公平，亦有內地人讚，「兄弟，幹得好。」呢度有片睇 http://www.youtube.com/watch?v=8ORZAN9-Dqk