四年一度嘅世界盃下月11號喺南非揭幕，不過今次播映權由有線得到，無綫就會播映四場賽事包括揭幕戰、兩場準決賽同決賽，仲要只會喺數碼頻道直播。雖然播映全權落喺有線，但無綫都要喺宣傳攻勢爭番啖氣。噚日無綫體育節目主持鍾志光、韓毓霞及馬啟仁，聯同一班靚女藝員出席喺尖沙嘴嘅記者會，全部索女都着上球衣騷腿露腰，務求宣傳打響頭炮，梁政珏仲將手指甲搽埋無綫台嘅顏色同自己支持球隊阿根廷嘅國旗顏色，搶晒鏡頭。
高海寧南非直擊
為咗吸引觀眾，無綫難免要搞新意思，戲劇製作總監何麗全話：「我哋會用近7位數字由歐美引入視覺上新科技，畀觀眾睇到全新技術畫面同埋會有虛擬入球片段，節目類似遊戲，會喺翡翠台晚上12點播出，黃金時間就會播花絮同賽前預測。」而高海寧同馬啟仁會飛去南非拍外景花絮。
「唔會阻佢湊仔」
至於無綫契仔李克勤因為唱片公司同無綫嘅版稅糾紛未搞掂，搞到克勤無緣亮相，但係何麗全透口風話：「唔會冇克勤，仲傾緊，佢電台上午講波，我哋夜晚，包保唔會阻佢湊仔同瞓覺。」不過馮仁昭聽住先啦，始終版稅糾紛未搞掂。至於其他主持就有曾志偉、陳百祥呢幾位鐵腳。但怕唔怕變相好似幫有線宣傳？何麗全話：「有信心吸納到觀眾，但版權限制之下好多嘢都冇辦法。」