民主路從來唔易行，社民連義工何慇榮前日由港大國殤之柱出發，展開八日「從六四走到五一六」五區長征，目標喺5.16前走遍全港，沿途呼籲市民投票，不過佢起步冇耐已經有阻滯，行到去禮賓府時，揸住個大聲公叫煲呔去投票，好似佢咁，盡公民責任。
之後佢行到花園道，忽然有幾個警員現身，要求佢提供個人資料，以便警方「提供協助」，何慇榮同八方講，五區苦行呼籲選民投票純粹個人自發行為，唔需要警方協助，所以拒絕畀資料，擾攘一輪，警方先放行。
行咗兩日何慇榮噚晚抵達大埔，在太和邨過夜，佢話天雨略為影響行程，今日預計到上水、粉嶺，目標係入黑前去到元朗。