波動市走勢唔會一面倒，港股大跌幾日後，終爆發一次反彈，不過，要留意大市回升持久力有幾強？若然彈完又再散過，咁之前低位通常都無乜防守力，博反彈千祈唔好得意忘形。
淡市中做功課機搵筍股，係呢輪應市策略之一，有時市況不濟，筍股價值或越見凸顯。昌興國際（803）上月底出售水泥生產及銷售業務予台泥（1136），已收到36億元款項，另出售項目的代價餘額，亦將於完成賬目落實後支付，預計在兩個月內完成。
09年9月，昌興以16.21億元購入從事水泥及熟料產銷業務的PMHL54.28%權益，其後在上月底以38億元出售PMHL全部權益予台泥。按集團所佔權益，今次交易昌興實際獲利約4.41億元。截至09年9月底，集團公佈手頭現金約3.36億元，計埋今次回籠現金，公司明顯「水浸」！市場已有傳言公司未來動作多多，有可能涉及大型注資行動；該股昨升3.1%，收報0.495元，可伺機買入，首站目標0.55元。
方星俠