泰國榴彈打到香港！據了解，泰國榴彈大釘和金枕頭已經充斥市面，不少過熟榴彈更在生果檔即場爆開，榴槤味殃及方圓十里，逼使荃灣某甜品店要推出全新五款甜品，以圖俘虜一眾期待以久的榴魔王之心。
記者：趙志雄
攝影：陳陶鈞、楊錦文
Model：[email protected]
鳴謝：蕭記（荃灣楊屋道街市2087舖/24985963）
沛公：大釘勝金枕
說到榴槤，阿媽自小教落首選金枕頭，皆因核細肉多，肉少核大的大釘是次選，所以金枕頭的價錢也較貴；不過用榴槤做甜品就剛好相反，「沛公甜品」老闆沛公：「金枕頭雖然多肉，但香味不及大釘濃，所以做甜品，一定要用大釘。」大釘供應期短，肉又較少，相對成本大增，因為計果肉，平均三個大釘才及得上一個金枕頭。同時，榴槤較難榨汁，用來做甜品比其他多汁生果麻煩，反而沙冰、奶昔這類着重幼滑質感的甜品，不宜下太多果肉，肉少味濃的大釘就能派上用場。
沛公每星期到附近街市的相熟生果檔提貨一至兩次，早跟生果檔主說好，要最熟的榴槤做甜品，生果檔主因應他的提貨而多訂了泰國AP牌榴槤，好讓他選擇。沛公：「新年前後一個月沒榴槤供應，約四月大釘當造，現在大釘已經到水尾，來貨主要是金枕頭，一直到年尾。趁還有大釘做甜品，愛濃味榴槤的朋友，想吃要快手，我現在的大釘存貨，約夠供應至五月尾。」他的甜品店位於登發街這美食區，L形舖位，用螢光綠做主色調，加上沛公一身綠色打扮，街坊都知這裏主打榴槤甜品，除日賣一百份的榴槤千層班戟、熱榴槤酥、榴槤腸粉及榴槤布甸外，今年更一口氣出了五款新榴槤甜品，以賣相計，像波子棋盤的星形班戟最靚絕，下層是招牌千層班戟，蛋黃、麪粉、牛油造的皮，夾住忌廉和榴槤肉，共有十多層，鋪面是五顏六色的M&M's朱古力豆，做派對蛋糕最吸引。愛者香厭者臭，無肉不歡嗜重口味者，推介榴槤黑糯米，一大團榴槤肉，吃完不口臭至奇，大大碗黑糯米非常飽肚；初嚐榴槤者，可試試喝沙冰，啜一口，槤榴香味直竄入喉嚨；不慣吃得太甜，可試試奶昔，混了椰汁不會太膩；如果看足球比賽當小吃，建議吃榴槤曲奇，只有輕輕榴槤味，怕臭朋友可以一試。相反，若嫌不夠臭，沛公教路：「榴槤混了忌廉，放入雪櫃雪兩日味更濃，但記得用密實袋，否則整過雪櫃都是榴槤味。」
沛公教你選榴槤
五星上將10吋$288/8吋$188
賣相靚絕，五角星外形如兒時常玩的波子棋，鋪面是紅黃綠啡藍五色M&M's朱古力豆，顏色鮮艷。蛋黃、麪粉、牛油造的皮，夾住忌廉和泰國AP牌大釘肉，層層叠共有十多層班戟，味道濃口感豐富，插蠟燭，當生日蛋糕也可。
榴槤沙冰$22
最清凉解渴之選，大啖沙冰灌入口，夾雜絲絲榴槤肉，沒誇張，喝完，真的齒頰留香。
榴槤酥$32
最香味四溢，一直是招牌貨，切開熱騰騰的鬆化香口酥皮，裏面就是濃稠榴槤餡，一舀，送入口，好滿足。
榴槤曲奇$28
別以為是榴槤核，一粒一粒的是曲奇餅，一包十塊，曲奇味比榴槤味強，軟身，咬口鬆化似鳳梨酥。
榴槤黑糯米$24
食肉獸至愛，大大團榴槤肉鋪面，離遠已經聞到榴槤香，榴槤肉本身甜膩，加大大碗黑糯米，最飽肚。
榴槤椰奶昔$24
顏色似牛奶，卻比普通牛奶香一百倍。入口清爽，榴槤和椰奶極配合，濃香加幽香，味道可口並不霸道。
沛公甜品（24111119）
荃灣路德圍登發街1號地舖
紅綠雙珠啖啖肉
講到榴槤甜品，九龍城最出名的有「金滿堂」，榴槤飄香是長期人氣甜品，去年最先推出榴槤味棉花冰，反應大好。最近老闆娘李太，引入洛神花和斑蘭葉珍珠做棉花冰Toppings，眼見這兩種珍珠，一紅一綠，非常奪目，李太：「這是全天然顏色的珍珠，價錢貴其他人造色素珍珠兩成，香港其他糖水舖還未有。」記者吃榴槤棉花冰，棉花冰入口即溶，咀嚼珍珠，煙煙韌韌有絲絲洛神花清香，着實不錯。另一推介是新出的翡翠榴槤杯，底層是榴槤布甸，旁邊是洛神花和斑蘭葉珍珠，上面一大個泰國金枕頭榴槤肉球，軟腍似雪糕，愛啖啖肉者一定滿足。
榴槤棉花冰$33
棉花冰入口即溶，輕微奶味配榴槤果甜，冰凉感覺直透入心，Cool呀。
榴槤飄香$33
熟客必點榴槤甜品，最底的布甸夾雜榴槤，上面有椰果條、纖維果和珍珠。
翡翠榴槤杯$33
新推出，賣相似雪糕，是金枕頭肉加榴槤布甸，旁邊浮面的紅綠珍珠，煙韌有咬口。
金滿堂（23833102）
九龍城城南道5號舖