福士甲蟲（Beetle）勁有性格，散發老爺車味但又Keep住可愛感，可塑性一向極高。不過睇見成堆名人幫甲蟲換新裝，包括楊采妮、ChocolateRain、鄧達智等名人及設計師發揮創意，先知「蟲」來無Out過。最令Fans興奮嘅，係仲有機會帶佢哋返屋企！
記者：趙慧敏
33架被打扮得花枝招展嘅只係甲蟲模型，唔係真車。失望？梗唔會，因為架架都有成幾呎長，再加上負責設計嘅都係名人、設計師、漫畫家同藝術系學生，令本來已夠性格嘅甲蟲各有獨特魅力。大家咁落力，當然唔係貪玩！VWHK搞呢個別注版設計，除咗讓設計者借蟲蟲「發聲」，更會將模型公開拍賣，所得善款會全數撥捐保良局。
貼布裝飾最搶
睇住33部風格獨特又繽紛嘅甲蟲模型，真係眼花撩亂，不過最喜歡車頭有大大個布公仔嘅「Volkswagen回憶拼湊」，作者係ChocolateRain設計師JaniceLiu。呢部車零舍搶眼，因為用一塊一塊小布貼上去，講究心機又考功夫，將不同圖案拼湊一起，有設計感之餘亦好有傳統味道。Janice就認為百家布呢種民間手工藝固然有代表性、懷舊得嚟又長青，就好似典型同型格兼備嘅NewBeetle，讓人重塑以往嘅記憶。
現場睇兼做善事
今日開始嘅NewBeetleArtGallery慈善拍賣展上，可欣賞到各設計者嘅心血結晶，有興趣更可以電郵或傳真出價競投，每架底價$2,010。
名人齊撐
Molly小甲蟲（KennyWong）
相當有漫畫感，大大個Molly公仔，個樣又型又寸，擺明要Show佢嘅DreamCar夠時尚感。
愛香港‧愛Bettle（TillScheer）
VWHK董事總經理用維港夜景概念，意謂「承載大家一同走過嘅歲月和足迹」，有意思！
甲蟲貓巴士（蘇敏怡）
設計師一直很想坐貓巴士，即使宮崎駿博物館也只限小孩坐，最後索性為自己設計番部。
小黃花（楊采妮）
楊采妮宣揚信息好正面，用隨處可見小黃花比喻生活條件有限嘅孩子，永不放棄、堅毅及樂觀。
我嘅日記（夏永康）
一身黑調全場最Cool，攝影師夏永康話：「捕捉了生活嘅點滴和感覺，就像日記一樣。」
保護殼（歐陽應霽）
鵪鶉蛋？無錯，佢話自然界最完美設計係蛋，同人類最有意義嘅機械：汽車，形神俱合！
皇帝墨寶（鄧達智）
大玩九龍皇帝時裝系列嘅鄧達智，將曾灶財墨寶臨摹喺甲蟲身上，兩者結合，定能博得港人會心微笑。
夢遊仙境（蔣怡）
索女蔣怡想講乜？「小小甲蟲車在門外守候着，不知不覺掉進夢中……夢裏鳥語花香……」聽見都冧死。
NewBeetleArtGallery慈善拍賣展
日期：5月11至30日
地點：尖沙嘴海港城港威商場地下走廊
詳情： http://www.facebook.com/NewBeetleArtGallery