啲男人結婚前都會搵班豬朋狗友癲一晚，美其名話告別單身，其實都係想蒲番晚。我哋姊妹都唔執輸，一樣要告別單身喎，沙田凱悅酒店嘅MeloSpa首席美容師Louisa同小妹報料，話佢哋嘅水療中心首次推出新娘婚前水療派對，等新娘同班姊妹可以relax吓，諗吓計點玩班兄弟團。
8,500元12人玩足5個鐘
講到水療小妹最鍾意，噚日走去Hyatt一，嗰間專為婚前派對用嘅套房好闊落，擺咗12張梳化座椅，仲有大玻璃窗睇到山景。Louisa話，今次係徇眾要求先推出婚前派對，「家啲新娘都好興婚前派對，好多新娘要求book房開水療派對。」佢話最經典早排有個新娘嘅未來奶奶，靜靜雞book咗間房送畀新抱仔開婚前派對，感動到新娘淚流披臉。
Louisa話，派對分四款，價錢由$4,350（8人用）嘅明淨健美套餐到$8,500（12人用）嘅活力提升套餐不等，水療項目包括足部護理、頸肩按摩、頭部穴位按摩、手甲同腳甲護理等等。「姊妹們可以玩足五個鐘。呢個婚前派對套餐，比散叫項目平咗大約兩成。」
上到嚟，梗係要試吓美容師嘅手勢，佢同小妹做個頸肩按摩，按完之後成身鬆晒。好姊妹雯雯就快結婚，一於幫佢搞番場水療婚前派對先。查詢電話37237684。
電郵：mailto:[email protected]