「維園阿哥」高分貝踩入《城市論壇》，唔止保皇黨不滿，白鴿黨卿姐都有投訴，《城市論壇》主持謝志峰噚日去網台接受卿姐訪問，卿姐指論壇太嘈，令佢聽唔到其他人講嘢。謝志峰反問卿姐，易地而處佢會點做？卿姐話唔會手軟，會將所有叫囂者「擺到好遠」。謝志峰話唔係辦法，「擺得越遠，只會激發啲人嗌得越大聲。」卿姐學咗警方設置示威區條橋：「咁再擺遠啲囉！」
港台唔係冇做嘢，謝志峰話已在台前加裝兩個喇叭，以便嘉賓聽清楚自己同其他人講乜，亦提供耳機畀嘉賓，不過至今未開齋，「唔知你（卿姐）聽覺係咪差少少？」謝志峰指嘈音源於政制問題，「如果政通人和、風平浪靜，你叫人星期日嚟維園嘈，都冇人會理你，寧願陪屋企人去飲茶好過啦。」