AngelaFatty：天生葫蘆身形，體重最高峯達200磅，曾以不同減肥法減去90磅，累積唔少減肥心得。
噚日講到，西柚減肥餐單真係好work，令我兩個月減咗15磅，但實情比預期少（預期減30磅），因為第一周激減7磅，點解第二周減得3磅？我估可能同我食量有關，因為呢個餐單最吸引我嘅地方，就係除咗澱粉質以外任食唔嬲，咁即係自己決定食幾多就幾多，總之食到飽為止。例如食Lunch或者晚餐，我會去超市買生菜整CaesarSalad，有啲人只會食半棵，但我覺得會好嘥就食晒成棵，結果無形中食多咗都唔覺，可能咁樣就影響咗減肥進度。所以雖然我已食咗呢個餐單兩個月，但只係減得15磅，OK失望o架；另外，餐單話早餐要食兩隻蛋，其實我都有少少保留，因為營養師話，成年人一般最好一日只食一隻蛋，如今要食兩蛋，長期係咁令我擔心膽固醇爆錶（雖然西柚有降膽固醇之效），於是我決定其中一隻只食蛋白，確保健康，唔知咁樣會唔會影響餐單效用呢？唉，睇嚟要做到餐單所設的目標：75日減52磅，對我嚟講可能性好低……
（西柚瘦身二之二）