「邊個?究竟係邊個講粗口鬧人?」噚日一班維園阿哥喺《城市論壇》火併自由黨,紅衫軍大戰黃衫軍,點知臨散場時,維園阿哥陣營有位少女成員,聲稱俾自由黨成員用粗口問候。母親節流流俾人問候媽媽,維園阿哥當堂好㷫,呼籲自由黨交人,要求邊位講粗口就自己企出嚟認錯。黃衫軍搵人問少女認唔認得誰是兇手,但係當時人多口亂,少女一時間都講唔出。
謝志峰被質疑好勞氣
維園阿哥好唔服氣,話既然自由黨冇人肯認,佢哋會睇錄影帶逐格畫面咁搵,誓要將爆粗人揪出嚟。八方建議佢哋不如仿效《食神》情節,叫當中有出席到場嘅自由黨成員,一字排開逐個講番嗰句粗口,等受害人認聲緝兇。不過講返轉頭,自從建制派向《城市論壇》施壓後,自由黨仍然先後兩次派黨員出席,比起收埋晒嘅民建聯算係勇氣可嘉。
噚日論壇火藥味濃,兩派觀眾台下爭講嘢,主持謝志峰左右做人難,公平對待兩邊都有觀眾唔鍾意,搞到佢嬲到叫台下如有不滿可以向廣播處長投訴。論壇過後,維園阿哥馬草泥邀請田二少上佢節目《城市再論壇》繼續討論,二少留有一手冇即時答應,話要睇睇傾乜題目至決定。